समाचारहरू

झुम्का कारागारमा रहेका अधिकांश कैदीबन्दीहरूमा छालाजन्य रोगको सङ्क्रमण पाइएको छ ।

जिल्ला अस्पतालको सहयोगमा कारागारभित्र जेठ १ गतेदेखि तीन दिनसम्म सञ्चालन गरिएको स्वास्थ्य शिविरमा स्वास्थ्य जाँच गराएका अधिकांश कैदीबन्दीहरूमा छालाजन्य रोगको सङ्क्रमण पाइएको जिल्ला अस्पतालका मेडिकल सुपरिटेन्डेण्ट डाक्टर देवराज घिमिरेले बताउनु भयो ।

कैदीबन्दीहरूमा शरीर चिलाउनेदेखि लुतो र दादको अत्यधिक सङ्क्रमण पाइएको मेसु घिमिरले बताउनु भयो ।

स्वास्थ्य जाँचका क्रममा मानसिक समस्या, हाडजोर्नीको समस्या, हर्निया, आँखा र मधुमेहसम्मका बिरामी फेला परेको मेसु घिमिरेले बताउनु भयो ।

कारागारमा रहेका अधिकांश कैदीबन्दीमा छालाजन्य सङ्क्रमण फेला पर्नुको प्रमुख कारण भीडभाड रहेको मेसु घिमिरेको भनाइ छ ।

मेसुसहित ४० जना चिकित्सकको टोलीले १ हजार ६ सय ८० जना कैदीबन्दीको स्वास्थ्य जाँचपड्ताल गरेको कारागारका प्रशासक भिमप्रसाद भट्टराईले बताउनु भयो ।

कैदीबन्दीहरूको स्वास्थ्य जाँचका लागि दुई चरणमा शिविर सञ्चालन गरिने कारागारका प्रशासक भट्टराईले बताउनु भयो । भट्टराईका अनुसार पहिलो चरणमा ए र बी ब्लकमा रहेका कैदीबन्दीहरूको स्वास्थ्य जाँच गरिएको छ ।

स्वास्थ्य शिविरमा विशेषज्ञ सेवा, जनरल मेडिसिन सेवाका साथै नाक, कान, घाँटीसहित भिडियो एक्स–रे र सर्जरीसहितको सेवा उपलब्ध गराइएको छ ।

कारागारमा रहेका कैदीबन्दीहरूलाई आधारभूत स्वास्थ्य उपचारको हक भएकाले सोही अनुसार कारागारमा शिविर सञ्चालन गरिएको प्रमुख जिल्ला अधिकारी हुमकला पाण्डेको भनाइ छ ।

जयकृष्ण यादव