समाचारहरू

मृतक व्यक्तिलाई जीवित र जीवित व्यक्तिलाई मृतक भनि सिफारिस दिएको आरोपमा प्रहरीले देवानगञ्ज गाउँपालिका-७ का वडाध्यक्ष सूर्यनारायण यादवलाई भदौ २६ गते गिरफ्तार गरेको छ ।

देवानगञ्ज गाउँपालिका-७ को वडा कार्यालयमा सर्जमिन हुँदा मृतक व्यक्तिलाई जीवित र जीवित व्यक्तिलाई मृतक भनि सिफारिस दिएको भनि लिखतसम्बन्धी कसुरमा वडाध्यक्षलाई ०८१ भदौ २६ गते गिरफ्तार गरिएको जिल्ला प्रहरी कार्यालयका डिएसपी नवीनकृष्ण भण्डारी बताउनु भयो ।

तत्कालीन राजगञ्ज सिनुवारी गा.वि.स.को कार्यालयमा राम यादवले झुट्टा विवरण पेस गरी सम्बन्धित पञ्जिकाधिकारीद्वारा मृत्यु दर्ता प्रमाण पत्र बनाइ सुनसरी जिल्ला अदालतमा पेश गरेको मृत्यु दर्ता प्रमाण पत्रलाई पुनः प्रमाणित गरेकाले वडाध्यक्ष यादवलाई गिरफ्तार गरिएको डिएसपी भण्डारीले बताउनु भयो ।

राष्ट्रिय परिचयपत्र तथा पञ्जीकरण ऐन सम्बन्धी कसुरमा देवानगञ्ज गाउँपालिका-७ वडा कार्यालयमा सर्जमिन हुँदा वडाध्यक्ष सूर्यनारायण यादवले देवानगञ्ज गाउँपालिका-७ का सीताराम यादवको छोरा राम यादवको मृत्यु भइसकेको भनी झुट्टा विवरण लेखाइ सर्जमिन गर्नु भएको प्रहरीको भनाइ छ ।

सोही विवरण अदालत सहित विभिन्न कार्यालयहरूमा पठाइ राम भनिने रामानन्द यादवलाई अदालतबाट तोकिएको १० दश वर्षको कैदको लागत कट्टा गराउने नियत राखेकाले लिखत सम्बन्धी कसुरमा कारबाही गर्न यादवलाई गिरफ्तार गरी अनुसन्धान थालिएको डिएसपी भण्डारीले बताउनु भयो ।

देवनागञ्ज गाउँपालिका कार्यपालिकाका सदस्यहरू र वडाअध्यक्षहरुले यादवलाई राजनीतिक प्रतिशोधका कारणले गिरफ्तार गरेको भन्दै बिना सर्त रिहा नगरेसम्म गाउँपालिका र वडा कार्यालयहरू अनिश्चित कालका लागि बन्दको घोषणा गरेका छन् ।

गाउँपालिकाका कार्यवाहक अध्यक्ष अनिलकुमार भगतले वडाध्यक्ष यादवलाई राजनीतिक प्रतिशोधका कारण गिरफ्तार गरिएकाले अध्यक्ष यादवलाई विना सर्त रिहा नगरेसम्म आफूहरूले गाउँपालिका र वडा कार्यालयहरू अनिश्चित कालका लागि बन्दको घोषणा गरेको पत्रकार सम्मेलनमा जानकारी गराउनु भएको छ ।

जयकृष्ण यादव