समाचारहरू

दुषित पानीका कारण मुसिकोट नगरपालिका–४ वडागाउँको दजाकोटमा फैलिएको झाडा पखलाको प्रकोपका कारण १० दिनदेखि विद्यालय बन्द हुँदा पढाई प्रभावित भएको छ ।

गत वैशाख ८ गतेबाट गाउँका सबै नागरिक बिरामी पर्न थालेपनि स्थानीय पशुपति निमावि पनि बन्द गरिएको थियो ।

घरका अभिभावक र बालबालिका नै बिरामी पर्न थालेको र विद्यालयमा अझै धेरै सर्ने सम्भावना भएकाले विद्यालय बन्द गरिएको प्रधानाध्यापक जुक्तबहादुर छन्तेलले बताए ।

विद्यालयमा अहिले १ सय १५ जना बिद्यार्थीले अध्ययन गर्दै आएका छन् । समस्या अझै नियन्त्रणमा नआएकाले विद्यालय सञ्चालन नहुँदा नयाँ शैक्षिक सत्रको पढाई प्रभावित भएको प्रधानाध्यापक छन्तेलले बताए ।

झाडा पखलाकै कारण पशुपति निमाविको कक्षा ६ मा अध्ययन गर्ने १२ वर्षीय रेशम सिञ्जालीको मृत्यु भएको भएका छ । उनी टेक बहादुर रेश्मीका छोरा हुन् ।

मुसिकोट नगरपालिकाका कार्यपालिका सदस्य हरि छन्तेलका अनुसार परिवारले गलत सुचना दिएका कारण बालकको मृत्यु भएको थियो ।

‘सोही विद्यालयमा एक विद्यार्थीको ज्यान नै गयो, गाउँका सवै जसो बिरामी परेका कारण विद्यालय खोल्ने कुरै भएन ।’–छन्तेलले भने–‘अहिले अवस्था सुधार भएको छ । खोल्ने विषयमा सल्लाह गरिरहेका छौँ ।’

झाडापखालाबाट प्रभावित दजाकोटको सिङ्गो बस्तीमा खानेपानीको ठुलो समस्या देखिएको छ । एक सातादेखि गाउँमा प्रयोग गर्दै आएको पानीमा कोलिफर्म देखिएको थियो ।

गाउँ नजिकै अन्य कुनै खानेपानीको स्रोत नभएकाले टाढा रहेको तालखोला भन्ने ठाउँबाट नगरपालिकाले ट्याङ्करबाट खानेपानी वितरण गरिएको छ ।

तर, त्यो पर्याप्त नभएको स्थानीय युवा विमल छन्तेलले बताए । दजाकोट गाउँमा पिउने पानी शुद्धिकरण जाँच गर्नका लागि खानेपानी तथा ढल व्यवस्थापन विभागको पानी परिक्षण घुम्ती सेवा (वाटर एम्बुलेन्स) आएको छ ।

झाडापखाला प्रभावित क्षेत्रमा दुषित पानीका कारण रोगको थप प्रकोप फैलिन नदिन खानेपानी तथा सरसफाई मन्त्री बिना मगरको निर्देशनमा विभागको पानी शुद्धिकरण चेक गर्न आधुनिक उपकरणसहितको वाटर एम्बुलेन्स गाउँमा आएको मेयर सोमनाथ सापकोटाले बताए ।

टोपलाल अर्याल