समाचारहरू

रोल्पाको सुनछहरी झरना घुम्न गएकी नेपालगञ्ज उपमनपा–१८ की २४ वर्षीया चन्द्रा सुनारको डुबेर नभई योजनावद्ध रुपमा हत्या गरिएको पीडित पक्षले आरोप लगाएका छन् ।

पीडित पक्षका अनुसार १० वर्ष अघि चन्द्रा र उमेश सुनारले प्रेम विवाह गरेका थिए । केही महिना उनीहरूसँगै बसे पछि गएर उमेशले वास्ता गर्न छाडेका थिए ।

“आरोपित उमेशले लामो समय वास्ता नगर्नु र एक्कासी गत वैशाख २६ गते रोल्पा आउ भन्दै ५ हजार रूपियाँ पठाएका थिए । रोल्पा पुगेको तीन दिनमै उनको हत्या भयो । ” मृतकका आफन्त देउमल सुनारले भन्नु भयो ।

सुनारका अनुसार आरोपितको अर्की महिलासँग सम्बन्ध रहेको थियो । त्यसै कारणले हत्या गरेको हुनसक्ने सुनारले बताउनु भयो ।

हत्या घटनाको उजुरी दिन खोज्दा प्रहरीले उजुरी लिन नमानेको मृतकका आफन्त देउमल सुनारले बताउनु भयो ।

घटनाका सन्दर्भमा  सुनछहरी गाउँपालिकाका अध्यक्ष धनबहादुर पुन मगरले प्रहरीले उजुरी लिन नमानेको भन्दै पीडितपक्ष बाँकेको कोहलपुरबाट फोन गरेको बताउदै घटना जेजस्तो भएपनि प्रहरीले उजुरी लिनुपर्ने बताउनु भयो ।

प्रहरीले उजुरी नै नलिनु गैरजिम्मेवार कुरा भएको अध्यक्ष मगरले बताउनु भयो । मगरका अनुसार घटना ०८० वैशाख २९ गते साझ चारदेखि पाँच बजेको समयमा भएको हो ।  घटना अलि शङ्काष्पद नै रहेको अध्यक्ष मगरको भनाइ रहेको छ ।

घटनाका सम्बन्धमा जिल्ला प्रहरी कार्यालय रोल्पाका डिएसपी श्यामकुमार सारू मगरले प्रहरीले जाहेरी लेखेर ल्याउन भनेको तर पीडित पक्षले नै जाहेरी पोष्टमार्टम पछि दिन्छौ भनेपछि अहिले उजुरी  दिएको र घटनाको बारेमा थप अनुसन्धान भइरहेकोे बताउनु भयो ।

मृतकका आफन्तका अनुसार घटना स्थलमा मदिराको बोत्तल, शङ्काष्पद औषधि, यौनाङ्गमा घाउ भएको र नग्न अवस्थामा रहेको थियो ।

आरोपित उमेश पोवाङ प्रहरी चौकीमा कार्यरत छन् ।  घटनास्थल प्रहरी चौकीबाट डेढ घण्टाको पैदल दुरीमा छ ।

शवको पोस्टमार्टम  वैशाख ३१ गते जिल्ला अस्पताल रेउघामा गरी सोही दिन शव आफन्तलाई बुझाइएको छ ।

तिलक जिएम