झडपमा घाइते भएका शाहीको उपचारका क्रममा मृत्यु

  ०७९ जेठ ५ गते

खार्पुनाथ गाउँपालिकाको मतगणना स्थलको झडपमा घाइते भएका सोही गाउँपालिका–५ याङ्चुका ६१ वर्षीय छत्त शाहीको उपचारका क्रममा जेठ ४ गते मृत्यु भएको मृतकका छोरा सागर शाहीले जनकारी दिनु भएको छ ।

शाहीको नेपालगञ्ज मेडिकल कलेज बाँकेमा उपचारका क्रममा मृत्यु भएको हो ।

मतगणना स्थलबाहिर बसिरहेको बेला वैशाख ३१ गते गठबन्धन पक्षको ढुङ्गा प्रहारबाट शाही लगायतका नेकपा एमालेका तीन जना कार्यकर्ता घाइते भएको नेकपा एमाले निकट युवा संघका जिल्ला अध्यक्ष तथा मृतकका छोरा सागर शाहीले आरोप लगाउनु भएको छ ।

झडपमा घाइते हुनेमा सोही गाउँपालिका–५ याङ्चुका ३५ वर्षीय मन्दिरसिंह ऐडी र १८ वर्षीय नविन ऐडी रहेका छन् ।

टाउकोमा गम्भिर चोट लागेका घाइते तीनै जनालाई जिल्ला अस्पताल हुम्लामा वैशाख ३१ गते उपचारका लागि ल्याइएको थियो । तर जिल्ला अस्पताल हुम्लामा पनि उपचार हुन नसकेपछि बुबालाई जेठ १ गते जिल्ला बाहिर रिफर गरिएको सागरले जानकारी दिनु भएको छ ।

घटनाका सम्बन्धमा घोर भत्र्सना गर्दै नेकपा एमाले हुम्ला जिल्ला कमिटिले जेठ ५ गते प्रेस विज्ञप्ति प्रकाशन गरेको छ । हुम्ला जिल्ला उपाध्यक्ष डबल रावत र सचिव तिर्थराज बोहराद्वारा प्रकाशित विज्ञप्तिमा घटनामा संलग्न व्यक्तिलाई कानून बमोजिमको कारबाहीको माग गरिएको छ ।

प्रमुख जिल्ला अधिकारी सीता परियारले उपचारका क्रममा शाहीको मृत्यु भएको खबर आएको बताउनु भएको छ ।

घटनाका सम्बन्धमा मृतकका आफन्तले नौ जनाका विरुद्व जिल्ला प्रहरी कार्यालय, हुम्लामा जेठ ४ गते किटानी जाहेरी दिएका छन् । घटनामा संलग्न व्यक्तिको खोजी भइरहेको जिल्ला प्रहरी कार्यालय, हुम्लाका डीएसपी कृष्णराज ओझाले जानकारी दिनु भयो ।

HumlaPhoto_2022-05-19


नन्द सिंह