झडपका गम्भीर घाइतेलाई थप उपचारका लागि सुर्खेत र नेपालगञ्ज पठाइयो

  ०७९ वैशाख २५ गते

स्थानीय तहको चुनाव प्रचार प्रसारको क्रममा चौरजहारी र आठवीसकोटमा भएको नेपाली काँग्रेस र नेकपा माओवादी केन्द्रको झडपमा घाइते भएका आठवीसकोटका दुई जना घाइतेलाई थप उपचारका लागि वैशाख २४ गते हेलिकप्टरमार्फत सुर्खेत लगिएको छ भने चौरजहारीमा घाइते भएका दुई जनालाई थप उपचारको लागि नेपालगञ्ज पठाइएको छ ।

आ–आफ्नो पार्टीको प्रचार प्रसारका क्रममा विवाद हुँदा वैशाख २३ गते राति झडप भएको र त्यस क्रममा चौरजहारी र आठवीसकोटमा ६ जना गम्भीर घाइते भएको जिल्ला प्रहरी कार्यालय, रुकुम पश्चिमका डीएसपी बिष्णु सोतीले जानकारी दिनुभयो । उहाँका अनुसार गम्भीर घाइते हुनेमा तुलबहादुर कामी, शंकर बोहरा, यज्ञ बिष्ट, त्रिलोचन गिरी, डिल्लीराज बोहरा र सीता बोहरा रहेका छन् । डिल्ली र सीता बोहरालाई थप उपचारका लागि गाडीमार्फत नेपालगञ्ज लगिएको छ ।

रुकुममा दैनिक जसो राजनीतिक दलका बीचमा झडप हुने गरेको र यसले शान्ति सुरक्षामा खलल पुगेकाले सुरक्षालाई थप कडा बनाउन जिल्ला स्तरमा छलफल भइरहेको र सोही अनुसार सुरक्षा व्यवस्थालाई कडाईका साथ लागु गर्ने डिएसपी सोतीको भनाई छ । आठवीसकोट झडपमा नेकपा माओवादी केन्द्रका तर्फबाट वडाध्यक्ष पदका उम्मेद्वार केशरमान बिक, माओवादी केन्द्रका कार्यकर्ता तुलबहादुर बिक, सन्तोष बिक र झडप नियन्क्रण गर्ने त्रममा दुई जना नेपाल प्रहरी पनि सामान्य घाइते भएको उहाँले जानकारी दिनुभयो । घाइते भएका प्रहरीको नाम डीएसपी सोतीले खुलाउन भएन ।

त्यसैगरी चौरजहारी झडपमा गुमान नेपाली सामान्य घाइते भएका छन् । घाइतेहरूको नगर अस्पतालमा प्राथमिक उपचारपछि डिस्चार्ज भएको र अवस्था सामान्य रहेको उहाँको भनाई छ । घटना भएका क्षेत्रमा थप सुरक्षाकर्मी परिचालन गरेको डिएसपी सोतीले जानकारी दिनुभयो ।


मनिषा केसी