समाचारहरू

जिल्ला प्रशासन कार्यालयलगायत सम्पूर्ण सरकारी कार्यालयहरूले ०७३ कात्तिक २६ गतेदेखि जिल्लाको थलाकाँडा र गाँजरी गाविसमा घुम्ती शिविर आयोजना गरेपछि आफूहरूले आधिकार पाएकोमा स्थानीय ज्येष्ठ नागरिक र अपाङ्गता भएका नागरिक खुसी भएका छन् ।

जिल्ला सदरमुकामदेखि तीन दिनको पैदल दुरीमा पर्ने बैतडीको विकट क्षेत्र थलाकाँडा र गाँजरीमा घुम्ती शिविरमार्फत नेपाल सरकारले जिल्लामा प्रवाह हुने सेवालगायत ज्येष्ठ नागरिकहरूले पनि नागरिकता र ज्येष्ठ नागरिक परिचयपत्र पाएका हुन् । अब उनीहरूलाई सामाजिक सुरक्षा भत्ता पाउने बाटो खुलेको छ ।

घुम्ती शिविरको माध्यमबाट थलाकाँडा र गाँजरी गाविसका ७४ जनाले अपाङ्गता परिचयपत्र पाएका छन् भने १० जना ज्येष्ठ नागरिकले ज्येष्ठ नागरिक परिचयपत्र पाएका छन् । 'सदरमुकाम टाढा भएकाले जानसकेको थिइनँ । सरकारले गाँउमै आएर परिचयपत्र दिँदा निकै खुसी लागेको छ ।'-थलाकाँडा गाविसका ७३ वर्षीय ज्येष्ठ नागरिक महासिंह साउदले भने ।

शिविर मार्फत उमेर पुरा भई आर्थिक अभाव र भौगोलिक विकटताका कारण नागरिकताबाट वञ्चित ७ सय ३३ जनालाई नेपाली नागरिकता प्रमाणपत्र वितरण गरिएको सहायक प्रमुख जिल्ला अधिकारी दिपक आचार्यले बताए ।

उक्त क्षेत्रका अपाङ्गता भएका र ज्येष्ठ नागरिकहरूले परिचयपत्र नपाउँदा सरकारबाट पाउने सेवा सुविधालगायत सामाजिक सुरक्षा भत्ता पाउन सकेका थिएनन् । 'वषौँसम्म नपाएको अधिकार घुम्ती शिविरले पायौँ ।'-शिवलिङ्ग गाविसका ९४ वर्षीय ज्येष्ठ नागरिक मुनादेवि जोशिले भनिन् ।

नरी बडु