समाचारहरू

मालिकार्जुन गाउँपालिकाले ज्येष्ठ नागरिक, अपाङ्गता भएका व्यक्तिहरुलाई वडासम्मै पुगेर सामाजिक सुरक्षा भत्ता वितरण गरेको छ । गाउँपालिका केन्द्रमा रहेको माछापुच्छ्ररे बैंकसम्म आउन नसक्ने ज्येष्ठ नागरिक र अपाङ्गता भएका व्यक्तिहरुलाई शिविरको माध्यमबाट वडामै सामाजिक सुरक्षा भत्ता वितरण गरिएको हो ।

गाउँपालिकाले सामाजिक सुरक्षा भत्ता वडामै प्रदान गरेपछि ज्येष्ठ नागरिक पनि खुसी भएका छन् । ज्येष्ठ नागरिक गणेशसिह धामीले भन्नु भयो, ‘गाउँपालिकाले वडा तहमै पुगेर सामाजिक सुरक्षा भत्ता वितरण गरेपछि बैंकसम्म पुग्नुपर्ने बाध्यता हटेको छ ।’ यस कार्यले हामीलाई निकै राहत महशुस भएको छ । गाउँपालिकासम्म पुग्न धेरै समय लाग्थ्यो । वडामै आएर भत्ता पाएपछि समय बचत पनि भएको उहाँले बताउनु भयो ।

आर्का ८५ वर्षीय बीरसिह धामी सामाजिक सुरक्षा भत्ता बुझाउन वडामै कर्मचारी आएपछि मख्ख हुनुहुन्छ । उहाँले भन्नु भयो, ‘हामीजस्ता अपाङ्गता भएका व्यक्तिको लागि वडामै भत्ता बुझ्न पाउन खुसीको कुरा हो । गाउँपालिका पुग्दा कति ओकालीओराली गर्नु पर्‍यो । अहिले वडामै कर्मचारी र बैंक नै पुगेपछि यो भन्दा सहजता अरु के हुन सक्छ ।’

मालिकार्जुन गाउँपालिका–२ का चिमती धामी तीन घण्टा हिड्नु पर्ने ठाउँमा अहिले वडामै भत्ता बुझाउन कर्मचारी पुगेपछि एक घण्टामै भत्ता लिन सहज भएको सुनाउनु हुन्छ । गाउँपालिकाले जनतालाई वडासम्मै पुगेर सामाजिक सुरक्षा भत्ता वितरण गरेपछि स्थानीयको समय पनि बचत भएको छ ।

गाउँपालिकाले आठ ओटा वडामध्ये ६ ओटा वडाहरुमा पुगेर १ सय ५४ जना महिला तथा ८० जना पुरुष गरी २ सय ३४ जनालाई सामाजिक सुरक्षा भत्ता वितरण गरेको छ ।

सामान्य हिडडुल गर्न नसक्ने ज्येष्ठ नागरिकहरु, अपाङ्गता भएका नागरिक बैंकसम्म स्वयंम उपस्थित हुन नसक्ने अवस्था आएपछि गाउँपालिकाले हरेक त्रैमासिकमा लाभग्राहीहरुलाई वडास्तरबाटै भत्ता वितरण गर्ने गरेको मालिकार्जुन गाउँपालिका सामाजिक सुरक्षा तथा पञ्जिकरण शाखा प्रमुख लोकेन्द्रसिंह धामीले बताउनु भयो ।

मालिकार्जुन गाउँपालिका वडा नम्बर १, २, ३, ४, ५ र ६ का वडामा पुगेर सामाजिक सुरक्षा भत्ता वितरण गरिएको हो ।

वडा नम्बर ७ का ज्येष्ठ नागरिकको खाता भने ग्लोबल बैंकमा खोलिएको छ । ग्लोबल बैंक वडामा नहुँदा सामाजिक सुरक्षा भत्ता लिन सास्ती हुने गरेको वडाध्यक्ष बहादुर चन्दले बताउनु भयो । उहाँले भन्नु भयोे– ‘पहिल्यै ग्लोबल बैंकमा खाता खोलिएको रहेछ, अहिले टाँढा भएर समस्या भयो भन्ने गुनासो छ ।’ गाउँपालिकामार्फत वडामै सामाजिक सुरक्षा पुग्ने व्यवस्थाको लागि आग्रह गरिएको उहाँले बताउनु भयो ।

नरेन्द्रसिह कार्की