समाचारहरू

सुनकोसी गाउँपालिका-१, आँपघारीकी ७२ वर्षीया पदममाया नेपालको शव घर भित्रै धानको बोराले थिचिएको अवस्थामा ०८० असोज २८ गते फेला परेको छ ।

घरमा एक्लै बस्दै आउनुभएकी नेपालको शव घर भित्रै धानको बोराले थिचिएको देखेपछि छिमेकीले प्रहरीमा खबर गरेका थिए । नेपाल असोज २६ गतेदेखि सम्पर्क विहिन भएपछि खोजी गर्ने क्रममा असोज २८ गते विहान उहाँको घरमा नै मृत्यु भएको अवस्थामा फेला पारिएको हो ।

सुनकोसी गाउँपालिका-१ का वडा अध्यक्ष रामकुमार श्रेष्ठले पदममायाको शव पुरानो लुगा र दुई बोरा धानले थिचिएको अवस्थामा फेला परेको बताउनु भयो । बाहिरबाट चुकुल लगाएको र घरमा केही कुहिएको गन्ध आएपछि छोरा र छिमेकीले ढोका खोलेर हेर्दा शव गनाई सकेको अवस्थामा फेला परेको बताउनु भयो ।

जिल्ला प्रहरी कार्यालयका डिएसपी चिरञ्जीवी दाहालले मृतक पदममाया नेपाल घरमा एक्लै बस्दै आएको र असोज २६ गतेदेखि सम्पर्क विहिन भएपछि खोजी गर्ने क्रममा घरमा नै शव फेला परेको जानकारी दिनुभयो ।

डिएसपी दाहालका अनुसार घरको भुइँमा धानको बोराले थिचिएको अवस्थामा शव फेला परेपछि मृतककी छोरा ५५ वर्षीय कृष्ण बहादुर नेपाल र ४२ वर्षीय माधव कुमार नेपालले प्रहरी चौकी, कुशेश्वर दुम्जालाई खबर गरेको र इलाका प्रहरी कार्यालय, खुर्कोटबाट प्रहरी टोली गई अनुसन्धान कार्य पुरा गरी शव पोष्टमार्टमको लागि शिक्षण अस्पताल, काठमाडौँ तर्फ पठाइएको थियो । घटनाको अवस्था हेर्दा हत्या भएको आशंका गर्न सकिने र यसबारे थप अनुसन्धान भइरहेकाले यसै भन्न नसकिने उहाँले बताउनु भयो ।

स्थानीयले पदममाया नेपालको हत्या भएको हुन सक्ने भन्दै अनुसन्धान गर्न माग गरेका छन् । बाहिरबाट चुकुल लगाएको, लुगा र धानले लास छोपेकाले उहाँको हत्या भएको भन्दै अनुसन्धान गर्न स्थानीयले माग गरेका हुन् ।

नबिनबाबु अधिकारी