ज्येष्ठ नागरिक सामाजिक सुरक्षा भत्ता पाउनबाट बन्चित

  ०७९ असोज ६ गते

नाम्खा गाउँपालिका–६ को लिमिका ज्येष्ठ नागरिकले आर्थिक वर्ष ०७८/७९ को सामाजिक सुरक्षा भत्ता पाउन नसकेको गुनासो गरेका छन् ।

गाउँपालिकाले सो भत्ता सेवाग्राहीको बैङ्क खाता सञ्चालन गरेर खातामा राखिदिए पनि लिमिका २ सय ५० ज्येष्ठ नागरिकहरू सदरमुकाम सिमकोट आउन नसक्दा भत्ता पाउनबाट बन्चित भएका हुन् ।

अघिल्लो आर्थिक वर्षको सामाजिक सुरक्षा भत्ता हालसम्म नपाएको हल्जी गाउँका ७७ वर्षीया कोन्ज्योक निमा तामाङले गुनासो गर्नु भयो । लामाले यसअघि गाउँमै कर्मचारी र जनप्रतिनिधि आएर भत्ता वितरण गर्ने गरेका थिए तर पछिल्लो समय नत जनप्रतिनिधि गाउँमा आउँछन नत कर्मचारी भन्दै गुनासो गर्नु भएको छ ।

उहाँले भन्नु भयो भत्ता पाउने नपाउने विषयमा आफूलाई कुनै जानकारी नभएको र राज्यले दिएको सेवा सुविधा गाउँमै आएर दिने व्यवस्था मिलाई दिएको भए हुन्थ्यो ज्येष्ठ नागरिक लामको भनाई छ ।

गाउँपालिकाबाट सामाजिक सुरक्षा भत्ता सेवाग्राहीको बैङ्क खातामा गएको भएपनि उहाँहरूले पाउन नसकेको नाम्खा गाउँपालिका–६ लिमिका वडाध्यक्ष पाल्जोर तामाङले बताउनु भयो ।

उहाँले ७० देखि ८० वर्षका ज्येष्ठ नागरिक सो भत्ता लिन गाउँपालिका केन्द्र याल्वाङ वा सिमकोट आउन नसक्ने भएकाले भत्ता पाउन नसकेको बताउनु भयो । उहाँले सेवाग्राहीको बैङ्क खातामा भत्ता हाल्ने कार्य पारदर्शिताका लागि उपयुक्त भए पनि तीन दिन पैदल हिडेर बैङ्कमा आउनु पर्ने लिमिका लागि व्यवहारिक नभएको र हाल त्यस क्षेत्रमा एक फिटसम्म हिउँ परेपछि ज्येष्ठ नागरिकलाई समस्या हुने गरेको बताउनु भयो ।

चालू आर्थिक वर्षको पहिलो चौमासिकको भत्ता पाउनु पर्ने बेला भए पनि लिमिका ज्येष्ठ नागरिकले भने अघिल्लो वर्षकै भत्ता नपाउनु दुखद भएको ८० वर्षीया निमा तुण्डुप लामाले गुनासो गर्नु भयो ।

गाउँपालिकाका अध्यक्ष प्रेम लामाले लिमिका ज्येष्ठ नागरिक बैङ्कमा आउन नसक्ने भएपछि बैङ्कलाई लिमिमै पुगेर सुविधा दिन आग्रह गर्दा बैङ्कले सुरक्षाका कारण जान नसक्ने जनाएपछि हालसम्म भत्ता पाउन नसकेको बताउनु भयो ।

गाउँपालिकाबाट सेवाग्राहीको बैङ्क खातामा सबै गरेर ३ करोड १७ लाख रुपियाँ गएको छ भने लिमिका लागि मात्रै सामाजिक सुरक्षा भत्ता ४ करोड १३ लाख रुपियाँ भए पनि मृत्युु भएका र नाम दोहोरिएका नागरिकको नाम हटाएपछि ९६ लाख रुपियाँ फिर्ता गएको गाउँपालिकाले जनाएको छ ।
Photohumla20220922.


नन्द सिंह