ज्येष्ठ नागरिकको हत्या घटनाका आरोपित गिरफ्तार

  २०७९ फागुन २८ गते

मुसीकोट नगरपालिका–८ घोरखानीका ७४ वर्षीय जितबहादुर बुढालाई हत्या गरेको घटनाका ६ जना आरोपितलाई प्रहरीले फागुन २८ गते गिरफ्तार गरेको छ ।

गिरफ्तार पर्नेमा सोही ठाउँ निवासी २० वर्षीय अनिल पुन, १७ वर्षीय दुई जना बालक, १६ वर्षीय दुई जना बालक र १४ वर्षीय एक जना बालक रहेका छन् ।

जितबहादुरका नातीसँग आरोपितहरूको रिसिइबी रहेको र नातीको रिसले जितबहादुरलाई ०७९ फागुन २७ गते कुटपिट गर्दा जितबहादुरको सोहीदिन मृत्यु भएको प्रारम्भिक अनुसन्धानबाट खुलेको जिल्ला प्रहरी कार्यालय, रुकुम (पश्चिम) का डिएसपी नवराज भट्टराईको भनाई छ ।

कुटपिटबाट गम्भीर घाइते भएका जितबहादुरको मृत्यु भएपछि उहाँको परिवारले प्रहरीलाई सोहीदिन जानकारी दिएपछि आरोपित सबैलाई गिरफ्तार गरेको जिल्ला प्रहरी कार्यालयका डिएसपी भट्टराईले जानकारी दिनुभयो ।

घटनाका सम्बन्धमा पीडित परिवारले फागुन २८ गते जिल्ला प्रहरी कार्यालयमा किटानी जाहेरी दिएका छन ।

कुटपिटबाट गम्भीर घाइते भएका बुढाको उपचारको लागि जिल्ला अस्पताल सल्लेमा ल्याएपछि सोहीदिन मुत्यु भएको डिएसपी भट्टराईले जानकारी दिनुभयो ।

शवको पोष्टमार्टम जिल्ला अस्पताल सल्लेमा भएको हो ।


मनिषा केसी