समाचारहरू

नेचासल्यान गाउँपालिकाले ७५ वर्ष माथि उमेर समूहका ज्येष्ठ नागरिकको स्वास्थ्य जाँचका लागि घरघरमा स्वास्थ्यकर्मी खटाएको छ ।

ज्येष्ठ नागरिकको स्वास्थ्य अधिकारलाई सम्बोधनका लागि गाउँपालिकाकाले ७५ वर्ष भन्दा माथि उमेर समूहका ज्येष्ठ नागरिकको स्वास्थ्य चेकजाँचका लागि स्वास्थ्यकर्मी खटाएको गाउँपालिका अध्यक्ष धनजन राईले बताउनु भयो ।

७५ वर्षभन्दा बढी उमेर समूहका ज्येष्ठ नागरिकहरूको स्वास्थ्य अवस्थाको बारेमा जानकारी लिनका लागि घरघरमा स्वास्थ्यकर्मी पुगेका छन् ।

घरदैलोमै पुगेर ज्येष्ठ नागरिकहरूको स्वास्थ्य उपचारसम्बन्धी सेवा उपलब्ध गराउन कार्यक्रम लागू गरी सञ्चालनमा ल्याइएको नेचासल्यान गाउँपालिकाका अध्यक्ष धनजन राईले बताउनु भयो ।

गाउँपालिका भित्रका पाँच ओटै वडाका घरघरमा पुगेर ज्येष्ठ नागरिकको तथ्याङ्क सङ्कलन, प्रेसर (उच्च रक्तचाप) चेकजाँच, स्वास्थ्य परामर्श र औषधि वितरणका लागि कार्यक्रम सुरू गरिएको गाउँपालिकाले जनाएको छ ।

चालु आर्थिक वर्षदेखि सुरू भएको यो कार्यक्रम गाउँपालिकाले अभियानकै रूपमा सञ्चालन गर्ने गाउँपालिका स्वास्थ्य शाखा संयोजक युवराज शर्माले बताउनु भयो ।

संविधानको धारा ३५ मा स्वास्थ्यसम्बन्धी हक र त्यसको उपधारा १ मा प्रत्येक नागरिकलाई राज्यबाट आधारभूत स्वास्थ्य सेवा निः शुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भन्ने उल्लेख छ ।

उपधारा २ मा आफ्नो स्वास्थ्य उपचारको सम्बन्धमा जानकारी पाउने हक हुने भन्ने उल्लेख भए पनि ग्रामीण भेगमा नागरिक आधारभूत स्वास्थ्य सुविधाबाट प्राय वञ्चित हुनु परेको छ ।

ज्येष्ठ नागरिकको अधिकार र स्वास्थ्य अधिकारकाको सवाल सम्बोधनका नेचासल्यान गाउँपालिकाले घरघरमा स्वास्थ्यकर्मी परिचालन गरी ज्येष्ठ नागरिकको स्वास्थ्य परीक्षण गरेको जिल्ला स्वास्थ्य कार्यालयका प्रमुख नारदमुनी सुवेदीले बताउनु भयो ।

ज्येष्ठ नागरिकको घरमा पुगेर स्वास्थ्य अवस्था, समस्या, प्रयोग गरेको औषधिका विषयमा समेत विवरण सङ्कलन गर्ने स्वास्थ्यकर्मीले परामर्श सेवा दिइरहेको छ ।

अञ्जु कार्की