समाचारहरू

व्याँस गाउँपालिका–२ दुम्लीङमा महाकाली नदी वारपार गर्न पुल नहुँदा स्थानीयले सास्ती भोग्नु परेको छ । कोरोनायता काठेपुल निर्माण नहुँदा यस क्षेत्रका ज्येष्ठ नागरिक, सुत्केरी, गर्भवती र विद्यालय जाने विद्यार्थीहरू थप जोखिममा रहेका छन् ।

झोलुङ्गे पुल निर्माणका लागि सम्बन्धित निकायसँग बारम्बार माग राख्दै आएपनि कसैले चासो नदेखाएपछि स्थानीयले सास्ती भोग्नुपरेको छ । दुम्लीङमा कोरोना अघिसम्म काठेपुलमार्फत वारपार गर्दै आइरहेका थिए । कोरोनापछि भारतीय सीमा सुरक्षा बल एसएसबीले काठेपुल लगाउन नदिएपछि स्थानीयले अहिलेसम्म ज्यान जोखिममा राखेर महाकाली वारपार गर्नुपरेको स्थानीय महेन्द्रसिह बुढाथोकीले बताउनु भयो ।

यहाँका कल्जु, दुम्लीङका ६० बढि परिवारले तुइनको प्रयोग गर्दै आएका छन् । पुल नहुँदा कयौंले अकालमै ज्यान गुमाउन बाध्य छन् । स्थानीयले दैनिक उपभोग्य वस्तु भारतबाट ओसार पसार गर्न निकै समस्या छ, स्थानीय प्रभात बुढाथोकीले भन्नु भयो, नेपालतिर गत असार महिनादेखि बाटो अवरुद्ध भएको छ । दार्चुला तिंकर सडक अहिले दुहुँ गाउँपालिकाको राताकाठासम्म मात्रै सुचारु छ । नेपालतिरको सडक अवरुद्ध भएपछि गाउँमा खाद्यान्न समेत अभाव हुन थालेको उहाँले बताउनु भयो ।

विगतदेखि दलका नेताले विभिन्न बहाना बनाउँदै मागलाई टाल्दै आएकाले दैनिक उपभोग्य वस्तु ओसारपसार गर्न, बालबालिकालाई विद्यालय जान असहज भएको छ । सदरमुकाम खलंगा पढ्न आउने विद्यार्थीको लागि ज्यानको जोखिम राखेर महाकाली नदी वारपार गर्नुपरेको स्थानीय पुजा भण्डारीले बताउनु भयो । गत वर्ष एक जना सचिन बुढाथोकीले खलंगाबाट छुट्टि भएर घर फर्किने क्रममा तुइनबाट खसेर ज्यान गुमाएमा थिए । विद्यार्थीले ज्यान गुमाउन थालेपछि यहाँका स्थानीय झनै चिन्तत बनेका छन् ।

बिरामीलाई उपचारका लागि अस्पताल लैजान झनै कठिनाइ भएको छ । गाउँमा आधारभूत स्वास्थ्य केन्द्रमात्र छ । बिरामी हुँदा त्यही तुइनको सहारामा सदरमुकाम वा भारततिर उपचारको लागि लैजानु पर्ने बाध्यता छ । आधारभूत स्वास्थ्य केन्द्रमा प्रयाप्त औषधि पाउँदैन् ।

दुम्लीङ क्षेत्रमा सरकारले पुल लगाउने पहल नगर्दा अहिलेसम्म २६ जनाले महाकाली नदीमा ज्यान गुमाइसकेका छन् । पुलको लागि जिल्लाबाट निर्वाचित सांसद, मन्त्री सबैलाई ध्यानाकर्षण गराइसकेका छौँ व्याँस गाउँपालिका वडा नम्बर २ का वडाध्यक्ष धिरेन्द्रसिह बुढाथोकीले भन्नु भयो, तर पुल निर्माणतर्फ कुटनीतिक पहल हुन सकेको छैन् । व्याँस गाउँपालिकाका अन्य तुइन भएको ठाउँमा अहिले पुल निर्माण भए पनि दुम्लीङबस्तीको लागि मात्र झोलुङ्गे पुल निर्माण हुन सकेको छैन् ।

पुल निर्माणको विषयमा दार्चुलाबाट निर्वाचित सांसदमार्फत परराष्ट्रमन्त्रालयलाई जानकारी गराइसकेको प्रमुख जिल्ला अधिकारी किरण जोशीले बताउनु भयो । महाककाली नदीमा पुल निर्माण गर्ने विषय अन्तर्राष्ट्रिय मामिला हो । महाकाली नदीका अन्य ठाउँमा तुइन विस्थापन गर्दै झोलुङ्गे पुल निर्माण भएका छन् । एउटा मात्रै पुल थप बनाउन सके दुम्लीङबासीलाई सहज हुने भन्दै आफ्नोतर्फबाट पहल गरिएको उहाँले बताउनु भयो ।

नरेन्द्रसिह कार्की