समाचारहरू

भारतको जिल्ला सुपौल कमलपुर ग्राम–२ कुनौली थानाका ६५ वर्षीय रघुबिर मेहताको हत्या गरेको आरोपमा फरार रहेका सोही ठाउँका ४० वर्ष उमेरका मैदिन मियाँ र हलुवान मेहता विरुद्धको उजुरी २०७९ माघ ३ गते मुल्तबीमा राख्ने फैसला भएको छ ।

जिल्ला न्यायाधीश हरिश्चन्द्र इङ्गनामको इजलाशले घटनाको २२ वर्षपछि मुद्दाको अन्तिम आदेश गर्दै मुल्तबीमा राख्ने फैसला गरेको सप्तरी जिल्ला अदालतले जनाएको छ ।

सप्तरीको हनुमाननगर कंकालिनी नगरपालिका–१ भारदहस्थित कोशी ब्यारेज पुलभन्दा दुई किलोमिटर पश्चिम कोशी पश्चिमी नहरको दक्षिण डिल किनारमा ०५७ साउन ३२ गते जेष्ठ नागरिक मेहताको लाश फेला परेको थियो ।

लाश फेला परेको खबर पछि सनाखत गरेका मृतकका छोरा ३५ वर्षीय सहदेव मेहताले जिल्ला प्रहरी कार्यालयमा ०५७ भदौ १ गते उजुरी दिनुभएको थियो । भारतको बिरपुर अदालतमा तारेख लिन गएका बुबाको पछि–पछि गएका आरोपितहरूले विषादी खुवाई हत्या गरेको सहदेवले आरोप लगाए । शवको पोष्टमार्टमा राजविराजस्थित गजेन्द्रनारायण सिंह अस्पतालमा ०५७ भदौ १ गते भएको थियो । जिल्ला प्रहरी कार्यालयले ०५७ भदौ ८ गते कर्तव्य ज्यानको उजुरी दर्ता गरेको थियो ।

आरोपितहरू फेला नपरेपछि जिल्ला प्रहरी कार्यालयले २० वर्ष पछि जिल्ला सरकारी वकिल कार्यालयमार्फत ०७७ साउन ४ गते अदालतमा अभियोग पत्र दायर गरेको थियो । आरोपितहरू विरुद्ध अदालतले सोही दिन र ०७८ असोज ७ गते वारेण्टसहितको म्यादी पुर्जी जारी गरेको थियो । आरोपितहरू फेला नपरेपछि अदालतले गोरखापत्र राष्ट्रिय दैनिक पत्रिकामा ०७९ असार १३ गते आरोपितहरूको नामको समाह्वान म्याद सूचना जारी गरेको थियो ।

मनोहरकुमार पोखरेल