समाचारहरू

जुम्ला कारागारमा कैद भुक्तान गरिरहेका एक जना कैदीको मुत्यु भएको छ । खत्याड गाउँपालिका–३ मुगु घरभई हाल जुम्ला कारागारमा रहेका ३४ वर्षीय प्रदिप टमटाको साउन २० गते मृत्यु भएको हो ।

उच्च रक्तचापका कारण कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा मृत्यु भएको जेलर जयाप्रसाद पाण्डेले बताउनु भयो । उहाँले भन्नुभयो, साउन २० गते बिहानै व्याडमिन्टन खेल खेलिसकेपछि खाना खानु अघि छाती दुख्यो भनेर कारागारको गल्लीमा ढलेका हुन् ।

कारागारबाट उपचार गर्न अस्पताल लग्यौ । अस्पताल पु¥याएको दुई घण्टापछि मृत्यु घोषणा भएको जेलर पाण्डेले बताउनु भयो । उहाँले भन्नुभयो, मृतक टमटाका आफन्त नेपालगन्ज र मुगुबाट जुम्ला आउदै हुनुहुन्छ । साउन २१ गते शव पठाउने तयारी गरिएको छ । मृतक टमटाकी पत्निसहित एक छोरी र दुई छोरा रहेका छन् ।

उच्च अदालत सुर्खेत, जुम्ला इजलासले बलात्कार घटनामा प्रदिपलाई पाँच वर्ष कैद तोकेको थियो । उनी ०७९ साउन २७ गते जुम्ला कारागारमा आएका हुन् । उनले तीन वर्ष  कैद भुक्तान गरिसकेका थिए । उच्च र जिल्ला अदालतले उनलाई दोषी ठहराएको थियो ।

जुम्ला कारागारमा पाँच जना महिलासहित १ सय २३ जना कैदीबन्दी रहेका छन् ।

मानदत्त रावल