समाचारहरू

जाजरकोट, जाजरकोट जिल्लामा क्रियाशील विभिन्न पेशागत सङ्गठन तथा अधिकारकर्मीहरूले समय समयमा जिल्लामा हुने अधिकार हनन् र ज्यादतीका घटनाविरूद्ध वकालत तथा पैरवी गर्नका लागि खीमबहादुर शाहीको संयोजकत्वमा ११ सदस्यीय जिल्लास्तरीय मानव अधिकार सञ्जाल गठन गरिएको छ ।

चैत २२ गते सदरमुकाम खलङ्गाको होटल हिमालयमा अनौपचारिक क्षेत्र सेवा केन्द्र (इन्सेक) जाजरकोटको संयोजनमा आयोजित कार्यक्रममा गठन गरिएको जिल्लास्तरीय मानव अधिकार सञ्जालको संयोजकमा मानव अधिकार एलाइन्सका शाही र अन्य सदस्यहरूमा  नेपाल पत्रकार महासङ्घका हेमन्त केसी, गैरसरकारी संस्था महासङ्घका सहदेब बस्नेत, महिला मानव अधिकार रक्षक सञ्जालकी मुना चौधरी, अन्तरपार्टी महिला सञ्जालकी तारा शाक्य, नेपाल बार एशाशियसनका निमबहादुर शाही, मानव अधिकार सङ्गठनका रमेश सिंह, नागरिक समाजका प्रतिनिधिहरू राजेन्द्रविक्रम शाह र केशवजङ्ग शाह, अशल शासनकर्मी बालकुमार शर्मा र इन्सेकका जिल्ला प्रतिनिधि दिनेशकुमार श्रेष्ठ सदस्य रहेका छन् ।

जिल्लास्तरीय मानव अधिकार सञ्जालले जिल्लामा हुने मानव अधिकार उल्लङ्घन तथा ज्यदतीका घटनाविरूद्ध पैरवी गर्नुका साथै जिल्लामा रहेका सातै वटा स्थानीय तहमा समेत मानव अधिकार सञ्जाल गठन गर्ने योजना समेत बनाइएको छ ।

दिनेशकुमार श्रेष्ठ