समाचारहरू

हुम्लाका सात ओटै गाउँपालिकामा यतिखेर रूघाखोकीको महामारी फैलिएको छ । रूघाखोकीबाट अहिलेसम्म चार जनाले ज्यान गुमाई सकेका छन् भने सयौँ बिरामी परेका छन् ।

हुम्लाको जिल्ला जनस्वास्थ्य कार्यालयमा सिटामोलसमेत नभएपछि स्थानीयबासी प्रत्यक्ष मर्कामा परेका छन् ।

सबैजसो बिरामीमा स्वास फेर्न गाह्रो हुने, ज्वरो आउने, खोकी लाग्ने, बान्ता हुने जस्ता लक्षण देखिएको छ । पुस १८ गते बिहान मात्रै सर्केगाड गाउँपालिका-८ का ६६ वर्षीय शैकरे रोकायाको मृत्यु भएको छ ।

पुस १६ गते मात्रै सर्केगाड गाउँपालिकाका-७ का ६५ वर्षीय भ्याँले कार्की, सोही गाउँपालिका-७ कै ६७ वर्षीय खोईर्या शाही र ७० वर्षीय गोर्या जैशीको मृत्यु भएको स्थानीयबासी कलबहादुर ऐडीले बताए ।

रूघाखोकीको प्रकोपले गर्दा बढी जस्तो ज्येष्ठ नागरिक र बालबालिकाहरू धेरै प्रभावित भएका छन् । सुख्खा खडेरीको कारण धुलाम्य वातावरणले झन् स्वासप्रस्वासमा समस्या देखिएको स्थानीयले बताएका छन ।

गाउँमा स्वास्थ्यकर्मी नहुनु र स्वास्थ्य संस्थामा औषधि उपलब्ध नहुनुजस्ता कारणले बिरामीको ज्यान गएको स्थानीयबासी कलबहादुर ऐडीले आरोप लगाए ।

स्थानीय स्वास्थ्य चौकी रोडिकोट र प्राथमिक स्वास्थ्य चौकी राहदेवमा सिटामोलसम्मको अभाव छ । पहिला जिल्ला अस्पतालले औषधिलगायतका आवश्यक सामग्री निशुल्क पठाउने प्रावधान थियो । तर, अहिले गाउँपालिकाले नै खरिद गर्ने व्यवस्था छ । गाउँपालिकाले त्यसको व्यवस्थापन गर्न नसक्दा स्वास्थ्य संस्थामा औषधि अभाव भएको छ ।

विगत तीन महिनादेखि स्वास्थ्य संस्थामा औषधि नहुँदा कार्यलयमा हाजिर लगाएर बस्नु बाहेक अन्य काम नभएको राहदेव प्राथमिक स्वास्थ्य चौकीका इञ्चार्ज सुपे ऐडीले बताए ।

उनले भने-'गाउँमा बिरामी धेरै छन् । तर, यहाँ औषधि छैन । औषधि खरिद गर्न गाउँपालिका, वडालाई अनुरोध गरेका छौँ । सुनुवाइ भने भएको छैन ।' समयमै उपचारको अभावमा बिरामीको ज्यान गएको स्थानीयको गुनासो छ ।

स्थानीयबासी काली रोकायाका अनुसार बिरामी भएको बेला चार घण्टा हिँडेर पनि स्वास्थ्यचौकीमा पर्याप्त मात्रामा औषधि नहुँदा बिरामी रित्तो हात लिएर घर फर्कनु परेको गुनासो गरिन् ।

उनले भनिन्-'स्वास्थ्य चौकीमा पुरा औषधि भए र उपचार पाए कोही मर्न पर्दैनथ्यो ।' यसैका बारेमा सर्केगाड गाउँपालिकाका अध्यक्ष कृष्ण रोकायालाई बुझ्दा अब सबै स्वास्थ्य संस्थाको लागि औषधि खरिद प्रक्रिया अघि बढेको जानकारी दिए ।

जिल्ला जनस्वास्थ्य कार्यालयका डाक्टर नविन रोकायाका अनुसार सदरमुकाम सिमकोटमा रहेको एक मात्र जिल्ला जनस्वास्थ्य कार्यालयमा त सामान्य सिटामोलसमेत छैन भने गाउँमा रहेका स्वास्थ्य चौकीमा झन् के हुनु यसका बारेमा छानबिन हुनै पर्छ भन्दै बताए ।

नन्द सिंह