समाचारहरू

शान्तिका लागि नागरिक समाजको सञ्जाल पोखराले बेपत्ता पारिएका व्यक्तिको छानविन, आयोग र सत्य निरुपण तथा मेलमिलाप आयोगको अध्यक्ष र सदस्य छनोट प्रक्रिया पारदर्शिताको माग गर्दै ध्यानकर्षण गराएको छ ।

कात्तिक २९ गते कास्कीका प्रमुख जिल्ला अधिकारी भरतमणी पाण्डेमार्फत सञ्जालले आयोग र सत्य निरुपण तथा मेलमिलाप आयोगको सदस्यहरुको सिफारिस गर्न गठित समितिलाई ध्यानकर्षण पत्र पठाएको हो ।

आयोगको अध्यक्ष र सदस्य छनोट गर्न गठित समितिले २०८१ कात्तिक २३ गते एक सूचना प्रकाशन गरी योग्यता पुगेका व्यक्तिबाट एक हप्ताभित्र आवेदन दिन माग गरेको थियो । त्यसमा सञ्जालले निवेदन दिएका निवेदकको निवेदनका आधारमा कसरी र कुन प्रकृया र विधिबाट छोटो सूची प्रकाशन गरिन्छ भनेर प्रश्न गरेको छ ।

छनोट प्रक्रिया पारदर्शी भए नभएको सुनिश्चित गर्न सिफारिस समितिले कस्तो मापदण्ड तयार पार्छ भन्दै सञ्जालले गठित समितिलाई प्रश्न गरेको छ । ‘सिफारिस गरिएका व्यक्तिको सार्वजनिक सुनुवाई गर्ने कुनै योजना तयार पारिएको छ की छैन ? र सिफारिस समितिले सिफारिस गरेका व्यक्ति नै आयोगका पदाधिकारीका रुपमा नियुक्त हुन्छन् भन्ने आधार के हो ?’ सञ्जालले ध्यानकर्षण पत्रमा भनेको छ ।

समाजका तर्फबाट शान्तिका लागि नागरिक समाजको सञ्जाल पोखराकी संयोजक विना सिलवाल, नागरिक मञ्च पोखराका विष्णुप्रसाद बराल, इन्सेक गण्डकी प्रदेश प्रमुख शिवप्रसाद खकुरेल, गैसस महासङ्घ नेपाल कास्कीका अध्यक्ष डा. बुद्धिबहादुर थापा र गण्डकीका प्रदेश समिति पदमराज पहारी लगायतले ध्यानकर्षण पत्र बुझाएका हुन् ।

त्यसैगरी उच्च अदालत बार पोखराका उपाध्यक्ष गिरिधारी सुवेदी, मानव अधिकार रक्षक संरक्षण र प्रवर्धन केन्द्रका उपाध्यक्ष, मानव अधिकार एलायन्स गण्डकी प्रदेश समिति शिवराज शर्मा, महिला मानव अधिकार रक्षक सञ्जाल कास्कीकी अध्यक्ष केशु भुजेल, चिल्ड्रेन नेपाल पोखरा निर्देशक डिल्लीप्रसाद शर्मा र सिविन नेपालका शङ्कर नेपालीले संयुक्त रुपमा ध्यानकषण पत्र बुझाएका छन् ।

सञ्जय रानाभाट