समाचारहरू

जिल्ला प्रशासन कार्यालयले विराटनगरका पाँच स्थानलाई निषेधित क्षेत्र घोषणा गरेको छ ।

कोशी प्रदेशसभा सचिवालयको कार्यालय क्षेत्र रहेको देवकोटा चोकदेखि अस्पताल चोकसम्म, मुख्यमन्त्री कार्यालय रहेको रोडशेष चोकदेखि जतुवा चोकसम्म, कोशी प्रोजेक्टस्थित मुख्यमन्त्री निवास वरपर, प्रदेश प्रमुखको कार्यालय र निवास वरपरको ३ सय मिटर क्षेत्र र जिल्ला प्रशासन कार्यालय मोरङ क्षेत्रलाई निषेधित क्षेत्र तोकिएको छ ।

कोशी प्रदेशका पूर्व मुख्यमन्त्री केदार कार्कीले ०८१ भदौ २५ गते प्रदेशसभा नजिकै आमरण अनशन सुरूआत गरेपछि जिल्ला प्रशासन कार्यालयले अर्को सूचना नहुञ्जेलसम्मका लागि विभिन्न पाँच स्थानलाई निषेधित क्षेत्र घोषणा गरेको छ ।

जिल्ला प्रशासन कार्यालय मोरङका प्रमुख जिल्ला अधिकारी प्रेमप्रसाद भट्टराईले सूचना जारी गर्दै निषेधित क्षेत्र तोकिएका स्थानमा सभा, जुलुस, धर्ना लगायतका गतिविधिमा रोक लगाइएको बताउनु भयो ।

आफ्नो कार्यकालमा लागू गरिएका केही कल्याणकारी योजना वर्तमान मुख्यमन्त्री हिक्मतकुमार कार्कीले हटाइदिएको भन्दै पूर्व मुख्यमन्त्री केदार कार्कीले भदौ २५ गतेदेखि प्रदेश सभा परिसरमा अनशन थाल्नु भएको छ ।

प्रशासनले भदौ २५ गते जरुरी सूचना जारी गर्दै ३ बजेदेखि लागू हुने गरी निषेधित क्षेत्र घोषणा गरेको हो ।

आदेश नभएसम्मका लागि सर्वसाधारणको आउजाउ र सवारी साधन बाहेक कुनैपनि किसिमको सभा, जुलुस, भेला र्‍याली, धर्ना, प्रदर्शनी लगायतका विरोधजन्य कार्यहरू गर्न स्थानीय प्रशासन ऐन, २०२८ को दफा ६ क अनुसार निषेध गरिएको प्रशासनद्वारा जारी सूचनामा उल्लेख छ ।

विनोद सुवेदी