समाचारहरू

जिल्ला कारगार कार्यालय खानेपानीको समस्या देखिएको छ । कारागार कार्यालय हाल १६ जना पुरुष कैदीबन्दी र १३ जना पुरुष थुनुवा गरी जम्मा २९ जना बन्दीहरु रहेका छन् ।

कारागारमा एक सय जना पुरुष कैदीबन्दी र ५० जना महिला कैदीबन्दी बस्न मिल्ने क्षमता रहेको हाल पुरुष कैदीबन्दी मात्र रहेका छन । एक महिना यता अत्याधिक चिसो बढेसंगै पाईपमा बरफ जम्न थालेपछि एक साता देखि कैदीबन्दीहरुका लागि दैनिक रुपमा प्रयोग हुने खानेपानीको दिगो व्यवस्थापनमा समस्या देखिएको हो । जेनतेन पाईपको व्यवस्थापन गरि नजिकैको तिप्लाखोलाबाट खानेपानी व्यवस्थान गरेतापनि नियमिततामा समस्या देखिदा कैदीबन्दीहरुलाई खानाको लागि र सरसफाईको लागि समस्या भएको कारागार कार्यालय डोल्पाका प्रमुख दर्घराज रोकायाले बताउनुभयोे । खानेपानी समाधानको लागि विभिन्न निकायमा पहल गरेको तर सुनुवाइ नभएको प्रमुख रोकायाले बताउनुभयो ।

यस्तै गरी चिसोको कारण कोठामा विछ्याउने केही नभएर समस्या भएको छ । बिजुली बत्तीको दिगोपनामा समस्या हुँदा अधिकांश समयमा कैदीबन्दी तथा सुरक्षाकर्मी अन्धकारमा बस्न बाध्य रहेका छन । कारागारको क्षमता अनुसारको फर्निचर नहुँदा समस्या देखिएको छ । हाल रहेको कैदीबन्दीहले मिलेर फर्निचरको प्रयोग गर्दै आइरहेका छन । कारागार देखि तल्लो भागमा खेलकुदको रंगशाला भएको हुँदा फोहोरको ढल व्यवस्थापन समस्या भइरहेको कारागार कार्यालयका प्रमुख दिर्घराज रोकायाले बताउनुभयो । कारागार कार्यालयमा त्यस्तो कुनै किसिमको व्यवस्थापनको लागि बजेट नआउने हुँदा कैदीबन्दीको आधारभूत समस्यालाई समाधान गर्न समस्या भइरहेको कारागार प्रमुख रोकायाले बताउनुभएको छ । जुनसुकै अपराधमा सजाय भोगेतापनि मानवीय नाताले सहयोग गर्न सम्बन्धित नियकायहरुलाई प्रमुख रोकायाले आग्रह गर्नुभएको छ ।

हिमाली जिल्ला डोल्पामा असोज महिना यता अत्याधिक जाडो हुने भएको हुँदा यसको कारण पाईपमा बरफ जम्दा खानेपानीमा समस्या हुने गरेको दुनै खानेपानी उपभोक्ता समितिका सचिव हिक्मत बहादुर शाहीले बताउनु भयो । जिल्ला कारागारमा रहेका कैदीबन्दीहरुलाई खानेपानीको समस्या छ भन्ने कुरा आएको छ कसरी हुन्छ तत्काल समस्या समाधानको लागि आवश्यक कामकार्य अगाडि बढाउने सचिव शाहीले जानकारी दिनुभयो ।

लेख बहादुर बुढा