समाचारहरू

जिल्ला अस्पताल बिजुवारमा रहेका भिडियो एक्सरे मेसीन बिग्रीएको आठ महिनासम्म पनि मर्मत नहुँदा सेवाग्राहीहरू मार्कामा परेका छन् ।

अस्पतालमा रहेको भिडियो एक्सरे मेसीन लामो समयसम्म सञ्चालन नहुदाँ अस्पताल आएका एक्सरे गर्नु पर्ने बिरामीहरू महंगो शुल्कमा  नीजि मेडिकलमा गएर एक्सरे गर्न बाध्य हुदै आएका छन् ।

पेट दुखेर जिल्ला अस्पताल गएको र डाक्टरले भिडियो एक्सरे गर्न सल्लाह दिए पछि आफूले  १ हजार रूपियाँ शुल्कमा मेडिकलमा एक्सरे गरेको प्यूठान नपा— १० की ४५ वर्षीया सुमित्रा पराजुलीले बताउनु भयो ।

पहिले जिल्ला अस्पतालमा ६ सय रूपियाँमा हुदै आएको भिडियो एक्सरे अस्पतालले मर्मत नगर्दा आफूले महंगोमा मेडिकलमा गएर भिडियो एक्सरे गरेको प्यूठान नपा — की ३७ वर्षीया हिरा खडकाले बताउनु भयो ।

पहिले दैनिक ५० जनाले भिडियो एक्सरे गर्ने गरेको जिल्ला अस्पतालको रेकर्ड रहेको र लामो समय सम्म भिडियो एक्सरे मेसीन बन्द हुँदा बिरामी निजी मेडिकलमा धाउनुपर्ने बाध्यता रहेको छ भने अस्पतालको  मासिक ६ लाख रूपियाँ भन्दा बढी आम्दानी गुमाउनु परेको जिल्ला अस्पतालका प्रमुख खिमप्रसाद पाध्यले बताउनु भयो ।

जिल्ला अस्पतालमा प्यूठानसँगै, अर्घाखाची, गुल्मी, रोल्पालगायत जिल्लाका बिरामी आउने गर्दछन् । बिरामी को चाप अस्पतालमा बढदै गएपनि सेवा बिस्तारमा चासो नपुगेको नागरिक समाजका अगुवा प्यूठान नपा — ४ का सुमन सुवेदीले बताउनु भयो ।

जिल्ला अस्पतालमा भिडियो एक्सरे सेवा छैन भन्ने सुन्दा पनि नागरिकहरू अचम्म मान्छन् तर अस्पताल प्रशासन भने हाइसन्चो मानेर बसिरहेको सुवेदीले बताउनु भयो ।

रविन्द्र पाण्डे