समाचारहरू

दैनिक भाइरल ज्वरोका बिरामीको सङ्ख्या वृद्धि भएपछि जिल्ला अस्पताल अर्घाखाँचीमा उपचारमा समस्या भएको छ । बिरामीको सङ्ख्या बढेपछि अस्पताल बाहिर शैया थपेर उपचार भइरहेको तथा औषधिको समेत समस्या भएको अस्पताल प्रशासनको भनाई छ ।

१५ शैयाको जिल्ला अस्पतालमा दैनिक पाँचदेखि सात जनाको दरले बिरामी भर्ना हुनेमा हाल सरदर ५० जना बिरामी दैनिक भर्ना भई उपचार गराउँछन् ।

जिल्ला अस्पतालमा शैयाको अभाव भएपछि बाहिरै पनि बिरामीको उपचार गरिएको जिल्ला अस्पतलाका प्रमुख डा. जगनाथ तिवारीले जानकारी दिए ।

जिल्ला अस्पतालमा दिनमा २ लाख रुपियाँसम्मको औषधि खपत हुँदै आएको छ । अस्पतालमा डाक्टरको दरबन्दी सङ्ख्या तीन रहेकोमा तीनै जना डाक्टर कार्यरत संलग्न छन् । बिरामीको सङ्ख्या बढे पनि डाक्टर सीमित सङ्ख्यामा रहेका कारण उपचार व्यवस्थापनमा समस्या भइरहको जिल्ला अस्पतालले जनाएको छ ।

जिल्ला अस्पतालका डाक्टर तिवारीले अस्पतालमा निःशुल्क पाइने औषधीको समेत अभाव हुन लागेको बताए । बिरामीले सबै प्रकारका निःशुल्क औषधि पाउन सकेका छैनन् । तिवारीले अस्पताल बाहिरबाट औषधि किनेर भएपनि बिरामीलाई उपलब्ध गराउने योजना रहेको बताए ।

नारायण भुसाल