समाचारहरू

तानसेनमा रहेको पाल्पा जिल्ला अस्तापलमा पाँच महिना यता पिउने पानीको अभाव भएको सेवाग्राहीले गुनासो गरेका छन् ।

अस्पतालमा पानीको अभाव हुँदा उपचारका लागि आउने बिरामी र बिरामीका कुरुवाले पानी पिउनका लागि अस्पताल बाहिर जानुपरेको बताएका छन् । यसअघि खानेपानी उपभोक्ता समितिले धारा जडान स्थल परिवर्तन गरेपछि धारामा पानी आउन छाडेको बताइएको छ ।

'अस्पतालमा पिउने पानी नभएकै कारण बाहिरबाट किनेर ल्याएर खानुपरेको छ ।'-तानसेन ४ सिल्खानटोलका बिरामीका कुरुवा शालिकराम अधिकारीले भने । अस्पतालमा बिरामीका लागि पिउने पानी र शौचालयमासमेत पानीको अभाव रहेको उनले बताए ।

अस्पतालमा रहेका दुई वटा वाटरगार्डबाट समेत पानी आउँदैन । मदनपोखरा-३ का ७६ वर्षीय बिरामी मानबहादुर सार्कीले पनि अस्पतालमा उपचारका लागि आउँदा पिउने पानीसमेत नपाएको र बाहिरबाट किनेर खानुपरेको बताए ।

अस्पतालमा दैनिक ५० जनाभन्दा बढी बिरामी उपचारका लागि आउने गरेको अस्पताल प्रशासनले जनाएको छ । चार/पाँच जनाको सङ्ख्यामा भर्ना भएका बिरामी पनि हुन्छन् । बिरामीका लागि मात्रै दैनिक २ हजार लिटर पानी आवश्यक भएपनि अस्पतालको धारामा एक सातामा ५ सय लिटर मात्रै पानी आउने गर्छ ।

अस्पताल व्यवस्थापन समितिका अध्यक्ष डा. पुरन बज्राचार्यले अस्पतालमा पानी अभाव भएको बताउँदै बेलाबेलामा ट्याङ्करबाट पानी ल्याउने गरेको जानकारी दिए । उनले ट्याङ्करमा ल्याएको पानी पर्याप्त नभएपनि केही हदसम्म भएपनि समस्या समाधान गरिएको बताए । तानसेन खानेपानी उपभोक्ता समितिका उपाध्यक्ष समेत रहेका बज्राचार्यले अस्पतालका लागि भन्दै छुट्टै धारा दिन मिल्ने अवस्था नरहेकोले पनि समस्या समाधान हुन नसकेको धारणा राखे ।

तानसेन खानेपानी उपभोक्ता समितिका अध्यक्ष चकोरमान शाक्यले यसअघि अस्पतालमा मासिक ६० हजार लिटरसम्म पानी दिने गरेकोमा अहिले समानुपातिक वितरण अन्तर्गत कटौती गरिएको बताउँदै यसको समाधानका लागि पहल गर्ने बताए ।

यज्ञमूर्ति तिमिल्सिना