समाचारहरू

जिल्ला अस्पताल जाजरकोटमा दुई महिनादेखि सिटामोल, आईरनचक्की, ब्रोफिन, रेनिटेडिन, मेट्रो, एमोक्सिलीन, बुस्कोपान, कोट्रिम, भिटामिन बि कम्प्लेक्स, जिंक ट्यावलेट, जेन्टामाईसिन, सिप्रोलगायतका औषधिको अभाव भएको छ ।

नेपाल सरकारले जाजरकोट जिल्ला अस्पताललाई दुई वर्षअघि १५ शैयाबाट स्तरोन्नती गरी ५० शैयाको बनाइए पनि औषधि अभाव र चिकित्सक नहुँदा उपचार सेवामा सुधार हुन सकेको छैन ।

जिल्ला अस्पताल कागजी रूपमा स्तरोन्नती गरिएपछि सरकारले निशुल्क औषधि दिन बन्द गरेको छ । बजेट अभावमा अस्पतालले समयमा औषधि खरिद गर्न नसक्नु र सरकारले निशुल्क वितरण गर्नु पर्ने औषधि नपठाउँदा समस्या आएको हो ।

५० शैया नाम मात्रको छ । बेड २५ वटा राखिएका छन् । तर स्तरोन्नती गरिएअनुसार जनशक्ति, पुर्वाधार र अन्य व्यवस्थापन शुन्य जस्तै छ । औषधि, आवश्यक उपकरण, दक्ष चिकित्सक, पुर्वाधार, खानेपानी तथा सरसफाई, व्यवस्थित प्रयोगशाला र ब्लड बैङ्कलगायत अभाव रहेको छ । आठ जना डक्टरको दरबन्दी रहेको जिल्ला अस्पतालमा हाल एक डक्टर करारमा कार्यरत छन् ।

सरकारले जिल्ला अस्पतालमा ७२ प्रकारका औषधि निशुल्क वितरण गर्ने भनिएपनि जाजरकोट अस्पतालमा भने सामान्य औषधि पनि पाइँदैनन् । मौसम परिवर्तनसँगै अस्पतालमा बिरामीको चाप दिनानुदिन बढ्दो क्रममा छ । तर, निशुल्क पाइने औषधि समेत नपाइँदा सेवाग्राही मर्कामा परेका छन् ।

भेरी नगरपालिका-३ की बिमला बिक टाउको दुख्ने र ज्वरो आउने समस्या देखिएपछि जिल्ला अस्पताल आइन् । चेकजाँचपछि उनलाई स्वास्थ्यकर्मीले औषधि लेखिदिए । तर, अस्पतालमा औषधि पाइनन् ।

आर्थिक अवस्था कमजोर भएका बिरामी बढी समस्यामा परेको महिला अधिकारकर्मी आशा कार्कीले बताइन् । उनले भनिन्-'अस्पतालमा डेलिभरी सेवाका लागि गज, कटन, ग्लोब्स र आरएल समेत अभाव छ । तर, अभाव भएको औषधि कसले आपूर्ति गर्ने हो यस विषयमा न अस्पतालले कुनै पहल गरेको छ नत सरकारले चासो देखाउँछ ।'

औषधिको आपूर्तिको लागि जिल्ला अस्पतालले भेरी नगरपालिकाको चालु आर्थिक वर्षको बजेटबाट औषधि खरिदका लागि बजेट छुट्याइदिन अनुरोध गरेको थियो । नगरपालिकाले भने २५ शैयाको अस्पतालमा मात्र औषधि पुर्‍याउने आफ्नो क्षेत्राधिकार भएको भन्दै बजेट विनियोजन नगरिएको जनायो ।

५० शैयाको अस्पतालको मापदण्ड भनेको विशेषज्ञ सेवा सञ्चालन गर्ने हो तर हालसम्म दरबन्दी अनुसार एकजना पनि विशेषज्ञ चिकित्सक आएका छैनन् ।

सेवामा कुनै सुधार नभएपनि जिल्ला अस्पताललाई दिइने निशुल्क औषधि त दिइनु पथ्र्यो, त्यो पनि कटौती भएको नेपाल पत्रकार महासङ्घका अध्यक्ष भिम बहादुर सिंले भने-'न विशेषज्ञसहित अस्पताल बन्यो न निशुल्क औषधि दिने अस्पताल नै !' अस्पताल कसको मातहतबाट चल्ने हो स्पष्ट नहुँदा पनि सेवाग्राही समस्या भोग्न बाध्य बनेको महासङ्घ अध्यक्ष सिंहले बताए ।

जिल्ला अस्पतालका निमित्त प्रमुख मेडिकल अधिकृत डा. अमिन शाहले औषधि सकिँदा उपचार सेवा प्रभावित भएको बताए । 'आन्तरिक श्रोतबाट खरिद गरिएका औषधिले हालसम्म जेनतेन चल्यो ।'-उनले भने-'अब कसरी उपचार सेवा चलाउने समस्या भइसक्यो, बजेट अभावमा औषधि खरिद गर्न सकेका छैनौ, नगरपालिकाले बजेट नदिदा थप समस्या भएको हो ।'

दिनेशकुमार श्रेष्ठ