समाचारहरू

जिल्ला अस्पतालमा डिजिटल एक्स–रे मेसिन जडान नहुँदा बिरामी मर्कामा परेका छन् । लुम्बिनी प्रदेश सरकारले ०७७ असारमा पठाएको मेसिन डीआर मेसिन र भवन नभएकाले सेवा सुरू हुन सकेको छैन ।

एक्स–रे गरी उपचार गर्नुपर्ने बिरामीहरू अन्य जिल्लामा उपचारको लागि जाँदा आर्थिक र सयमको खर्चको मारमा परिरहेका छन् ।

०७७ वैशाखमा पुथाउत्तरगंगा गाउँपालिका–१२ फल्नैका बिमला मल्ल पानी भर्न जाँदा चिप्लेर बायाँ हात भाँचिएपछि जिल्ला अस्पताल रुकुम पूर्वमा ल्याइयो तर कुन ठाउँमा भाँचियो भनेर थाहा पाउनका लागि डिजिटल एक्स–रे सञ्चालनमा नभएपछि जिल्ला अस्पतालमा उपचार हुन सकेन । उपचारको लागि उहाँलाई दाङ पठाएको थियो ।

उहाँ त एक उदाहरणीय मात्र हुन् । एक्सरे सेवा लिन जिल्ला बाहिर जानुपर्ने अवस्था रहेको छ । मेसिन सञ्चालनका लागि कम्तीमा पनि १० फिट अग्लो भवन चाहिन्छ । भवन नभएका कारण डिजिटल एक्स–रेका उपकरण जस्ताको त्यस्तै थन्क्याइएको छ । रुकुमकोट जिल्ला अस्पताल नै स्वास्थ्य चौकी रुकुमकोटको भवनमा सञ्चालित रहेकोले त्यसैपनि पुर्वाधारहरूको कमी छ  ।

डिजिटल एक्स–रे सञ्चालनका लागि सिस्ने गाउँपालिकाले भवन बनाउने निर्णय गरेको छ । अन्य शीर्षकबाट रकमान्तर गरेर बजेट विनियोजन गरिएको निमित्त प्रमुख प्रशासकीय अधिकृत चिन्तामणि दाहालले बताउनु भयो ।

भवन बनेर मात्रै पनि जिल्लामा सेवा सुरू हुने छाँट छैन । यसका लागि डिआर मेसिन ल्याउनुपर्ने हुन्छ ।

जिल्ला अस्पतालमा डिजिटल एक्स–रेका लागि भवन निर्माण हुने भएकाले डीआर मेसिन खरिदको पनि तयारी भइरहेको जिल्ला अस्पतालले जनाएको छ ।

जयमान बुढा मगर