समाचारहरू

जिल्ला अस्पताल कालिकोटमा दक्ष जनशक्ति अभावका कारण सेवाग्रहीहरू मर्कामा परेका छन् । आकर्षक अस्पताल भवन निमार्ण भए पनि सेवाको गुणस्तर कमजोर भएपछि यहाँ आउने बिरामीहरूले सास्ती भोग्नु परेको हो ।

गुणस्तरीय सेवा विस्तारका लागि जनशक्तिको सधैँ अभाव भइरहने भएकाले समान्य अप्रेसन गर्नु पर्ने बिरामी कर्णाली स्वास्थ्य विज्ञान प्रतिष्ठान जुम्ला,कर्णाली प्रदेश अस्पतालमा रिफर गर्नु परिरहेको स्वास्थ्य सेवा कार्यालयका प्रमुख डा. भीष्मप्रसाद पोख्रेलले बताउनु भयो । उहाँ सरकारले ५० शय्या अस्पतालको अुनमति दिने निर्णय गरे पनि प्रदेश सरकारले त्यसलाई रोकेका कारण जिल्ला अस्पताल गुणस्तरहिन भएको बताउनु भयो ।

जिल्ला समन्वय समितिका प्रमुख धनजित शाहीले कर्णाली प्रदेश सरकारसँग समन्वय गरी राम्रो भौतिक संरचनाको भरपुर उपभोग गर्दै बिरामीलाई गुणस्तरीय सेवा दिनु पर्नेमा जोड दिनुभयो । सामान्य ग्यास्टीकका कारण पेट दुखेपछि जिल्ला अस्पतालले आन्द्रामा घाउछ अप्रेसन गर्नु पर्छ भनेपछि जुम्ला जानु परेको स्थानीय विरेन्द्र बुढाले दुखेसो गर्नुभयो । अस्पतालका कर्मचारीले जनशक्तिको व्यवस्थापन गर्न सङ्घीय र प्रदेश सरकारको ध्यानाकर्षण गराए पनि सुनुवाइ भएको छैन ।

नेपालको संविधान २०७२ को धारा ३५ मा प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने हक हुने छ र कसैलाई पनि स्वास्थ्य सेवाबाट वञ्चित गरिने छैन भनि उल्लेख गरिए पनि अस्पतालमा सेवाको गुणस्तर कमजोर भएपछि यहाँ आउने बिरामीहरूले सास्ती भोग्नु परेको छ ।

कालीबहादुर मल्ल