समाचारहरू

जिल्ला अस्पताल पर्वतमा उपलब्ध हुनुपर्ने औषधि नै नभएपछि बिरामीहरूलाई औषधोपचारमा समस्या भएको छ ।

नार्कोटिक ग्रुप अन्तर्गत पर्ने मर्फिन र प्याथोडिन नामक औषधि जिल्ला अस्पताल पर्वतमा नभएपछि बिरामीलाई पोखरा रिफर गर्नुपरेको जिल्ला अस्पताल पर्वतका डाक्टर विष्णु भण्डारीले बताए ।

उक्त औषधि निजी क्लिनिकहरूले बिक्रीवितरण गर्न समेत अभिलेख राखेर मात्रै चिकित्सकको सल्लाह बमोजिम बेच्न पाउने तर सरकार मातहतका अस्पतालमा अनिवार्य हुनुपर्ने र चिकित्सकको प्रत्यक्ष निगरानीमा उपलब्ध गराउनुपर्ने व्यवस्था भएपनि जिल्ला अस्पतालमा उक्त औषधि नभएको डाक्टर भण्डारीले बताए ।

औषधि उपलब्ध नभएपछि पेटको समस्याले जिल्ला अस्पतालमा उपचारका लागि आएका कुश्मा नगरपालिका–७ खरेहाका बाबुराम पौडेललाई माघ २५ गते जिल्ला अस्पताल पर्वतले पश्चिमाञ्चल क्षेत्रीय अस्पताल पोखरा रिफर गरेको थियो ।

जिल्ला अस्पताल पर्वतका डाक्टर भण्डारीले आपूmले पटकपटक व्यवस्थापन समितिसँग औषधिसम्बन्धी गुनासो गरेको भएपनि लामो समयसम्म माग गरिएको औषधि उपलब्ध नभएको बताए ।

कुश्मा नगरपालिका–५ का गोकुल चापागाईँले अस्पतालमा उपलब्ध हुनुपर्ने औषधि नभएको भन्दै व्यवस्थापन समितिसँग गुनासो राख्दा समेत चासो नदिएको आरोप लगाए ।

जिल्ला अस्पताल व्यवस्थापन समितिका अध्यक्ष गोविन्द पहाडीले औषधि खरिदका लागि केही दिन अघि मात्रै टेण्डर भएको र उपलब्ध हुनुपर्ने औषधिहरू छिट्टै ल्याउने प्रयास भइरहेको बताए ।

औषधि खरिदका लागि जिल्ला अस्पताल पर्वतमा बजेट नभएको र औषधि खरिदको रकम स्थानीय कुश्मा नगरपालिकासँग रहेको हुँदा समस्या भएको उनले बताए ।

अस्पतालका चिकित्सकहरूका अनुसार नार्कोटिक गु्रप अन्तर्गतका औषधिलाई कतिपयले लागू औषधको रूपमा पनि प्रयोग गरेका छन् ।

यही कारण उक्त औषधिलाई सरकारको स्वीकृति बिना बेच्न मनाही गरिएको छ । तर, सरकारबाट नै सञ्चालित जिल्ला अस्पतालमा नै लामो समयदेखि औषधि नहुँदा बिरामीहरू भने मर्कामा परेका छन् ।

सन्तोष थापा