समाचारहरू

मिथिला बिहारी नगरपालिका–३ मिथिलेश्वर मौवाही घर भई हाल जनकपुरधाम उपमहानगरपालिका–९ थापा चोक बस्ने २२ वर्षीया आरतीकुमारी साहको हत्या घटनाका आरोपितलाई कारबाहीको माग गर्दै प्रदर्शन गरिरहेका प्रदर्शनकारी र प्रहरीबीच असार ५ गते जिल्ला अदालत अगाडि झडप भएको छ ।

मृतक आरतीकुमारी साहको ०८० जेठ ७ गते दाइजोको कारण परिवारजनबाट हत्या भएको पीडित पक्षको आरोप रहेको छ । घटनामा संलग्न आरोपितहरूलाई प्रहरीले जोगाउन खोजेको भन्दै पीडित (माइती) पक्षले अदालत अगाडि प्रदर्शन गर्दै ढुङ्गामुढा समेत गरेका छन् ।

स्थिति नियन्त्रणमा लिन प्रहरीले लठ्ठी चार्ज गर्दा चार जना घाइते भएका छन् । घाइते हुनेहरूमा नगराईन नगरपालिका–८ खिरखिरिया का ३२ वर्षीया लिला देवी, ३३ वर्षीया लाडोबति देवी, ३१ वर्षीय कृष्ण साह र ३६ वर्षीय प्रवीण साह रहेका छन् । सोही ठाउँका ३७ वर्षीय गोविन्द साह गिरफ्तार भएका छन् । घाइतेहरूको प्रादेशीक अस्पताल, जनकपुरमा उपचार भइरहेको पीडित पक्षले बताउनु भयो ।

पीडित पक्षले घटनाको निष्पक्ष अनुसन्धान र दोषीमाथि कारबाहीको माग गर्दै प्रदर्शन गरेका हुन् । पीडित पक्षलाई न्याय दिनुको सट्टा उल्टै प्रहरीले कुटपिट गरेको पीडित पक्षको आरोप रहेको छ । तसर्थ, प्रदर्शन गरिरहेका पीडित पक्षले जिल्ला प्रहरी कार्यालयका एसपी, डीएसपी, जिल्ला न्यायाधिवक्ता, पोस्टमार्टममा संलग्न डाक्टरमाथि अनुसन्धान गरी कारबाही गर्नुपर्ने, र आरतीको हत्या घटनाको अनुसन्धान नेपाल प्रहरीको केन्द्रीय अनुसन्धान ब्यूरो ९सीआईबी० ले गर्नुपर्ने सहितको ६ बुँदे माग राखेका छन् ।

न्याय तथा हत्या घटनाका आरोपितहरूलाई कारबाहीको माग गर्दै मृतकका बुबा आमासहित पीडित परिवारजन असार २ गते देखि काठमाडौंमा धर्नामा बसेका छन् ।

अजयकुमार साह