समाचारहरू

पुचौँडी नगरपालिका–२ स्थित महादेव आधारभूत विद्यालयको भवन जीर्ण अवस्थामा रहेका कारण पठनपाठनमा समस्या भएको छ ।

विद्यालयको तीन कोठे भवन जिर्ण भएको पाँच वर्ष वितिसक्दा समेत पुनर्निर्माण नहुँदा पठनपाठनमा समस्या भएको हो ।

भवन अभावले शिशु र कक्षा १ मा अध्ययनरत बालबालिकाहरुलाई एउटै कोठामा राखेर पढाउनु पर्ने बाध्यता रहेको प्रधानाध्यापक नवराज भट्टले बताउनु भयो ।

उहाँले भन्नु भयो– ‘भवन अभावले शिशु र कक्षा १ मा अध्ययनरत बालबालिकाहरुलाइ एउटै कक्षामा बसालेका छौँ । दिवाखाजा समेत सोही कक्षामा पकाउने गरेकाले समस्या भएको छ ।’

भवन अभावले पठनपाठन प्रभावित हुने गरेको उहाँको भनाइ छ । पुरानो भवन जिर्ण भएर भत्कीने अवस्थामा पुगेकाले कतिखेर अप्रिय घटना हुन्छ भनेर डर हुने गरेको  प्रधानाध्यापक भट्टले बताउन भयो ।

सिलेटले छाएको तीन कोठे जीर्ण भवन पानी परे चुहिने भएकाले झन समस्या हुने गरेको उहाँले बताउनु भयो । ‘स्थापना कालदेखिको पुरानो भवन जीर्ण भएर भत्कीने अवस्थामा छ ,चुहिन्छ पनि, अर्को भवन जस्तापाताले छाएको छ त्यो नि चुहिन्छ, हामीलाइ भवनको सारै अभाव छ, प्रधानाध्यापक भट्टले भन्नु भयो ।

कक्षा ८ सम्म पढाइ हुने महादेव आधारभूत विद्यालयमा ६ ओटा मात्रै कक्षा कोठाहरु छन् । पानी परेकाबेला सबै विद्यार्थी एउटै कोठामा बसालेर पढाउने गरिएको र घाम लागेको दिन विद्यार्थीलाई भूइँमा बसालेर अध्ययन गराउने गरिएको उहाँको भनाइ छ ।

राष्ट्रपति शैक्षिक सुधार कार्यक्रममा पटकपटक भवनका लागि निवेद दिएपनि राज्यले नहेरेको विद्यालय व्यवस्थापन समितिले जनायो ।

विद्यालय भवनको समस्याका बारेमा जानकारी भएको र आगामी वर्ष विद्यालय भवन निर्माणलाई प्राथमिकतामा राखिने नगरप्रमुख दिपकबहादुर बमले बताउनु भयो ।

नरी बडु