समाचारहरू

सोलुदूधकुण्ड नगरपालिका-५ का सल्लेरी ब्यारेक टोलका विश्वकर्मा समुदायलाई जातीय विभेद घटनामा आरोपित पक्षले माफी मागेपछि मिलापत्र गरिएको छ ।

दलित समुदायलाई सोलुदूधकुण्ड नगरपालिका-५ का कर्मा शेर्पाको मृत्यु संस्कारमा पहिले निमन्त्रणापत्र पठाइएको र पछि दलितले मृत्यु संस्कारमा आउनु हुँदैन भन्दै उर्दी गरेपछि जातीय विभेद गरेको आरोपमा पीडित पक्षले ०८१ साउन २९ गते जिल्ला प्रशासन कार्यालयमा ज्ञापनपत्र बुझाएको थियो ।

शेर्पा संस्कार अनुसार गरिने मृत्यु संस्कारका लागि साउन २६ गते सोलुदूधकुण्ड नगरपालिका-५ का सल्लेरी ब्यारेक टोलका विश्वकर्मा समुदायलाई मृतकका परिवारले निमन्त्रणापत्र पठाएको र केही समयपछि दलितले गुम्बामा आउनु हुँदैन भन्दै निमन्त्रणा कार्ड फिर्ता गराएको सोलुदूधकुण्ड नगरपालिका-५ का सुब्बे विश्वकर्माले बताउनु भयो ।

जातीय विभेद भएको भन्दै जिल्ला भरका दलित अधिकारकर्मीहरूले जिल्ला प्रशासन कार्यालयमा साउन २९ गते ज्ञापनपत्र बुझाएर आपत्ति जनाएका थिए ।

पीडित पक्षको ज्ञापनपत्रपछि जिल्ला प्रशासन कार्यालयमा भएको छलफलमा पिडक ङवाङ शेर्पा र जाङ्मु शेर्पाले माफी मागेपछि घटनामा मिलापत्र भएको हो ।

प्रमुख जिल्ला अधिकारी देवीपाण्डे खत्री, जिल्ला प्रहरी कार्यालयका डिएसपी द्वारिकाप्रसाद घिमिरे लगायत, दलित अगुवालगायतसँग साउन २९ गते भएको छलफलपछि मिलापत्र गराइएको हो ।

आरोपित पक्षले नियतले नभइ अञ्जानमा गल्ती भएको स्वीकार गरेपछि र आगामी दिनमा पुन त्यस किसिमका गल्ती नदोहोर्‍याउने प्रतिवद्धता जनाएपछि घटनामा मिलापत्र गरिएको जिल्ला प्रहरी कार्यालयका डिएसपी द्वारिकाप्रसाद घिमिरले बताउनु भयो ।

नेपालको संविधान २०७२ ले धारा २४ मा छुवाछूत तथा भेदभावविरूद्धको हकलाई व्याख्या एवम् व्यवस्था गरेको छ ।

सोही धाराको उपधारा १ मा कुनै पनि व्यक्तिलाई निजको उत्पत्ति, जातजाती, समुदाय, पेशा, व्यवसाय वा शारिरीक अवस्थाको आधारमा कुनै पनि निजी तथा सार्वजनिक स्थानमा कुनै प्रकारको छुवाछूत वा भेदभाव गरिने छैन भन्ने उल्लेख छ ।

अञ्जु कार्की