समाचारहरू

सिंजा गाउँपालिका–६ का २९ वर्षीय विवेन्द्र नेपालीलाई जातीय विभेद गरेको कसुरमा सोही ठाउँका ३२ वर्षीय नवीन बुढालाई प्रहरीले ०८१ भदौ ३१ गते गिरफ्तार गरेको छ ।

जिल्ला प्रहरी कार्यालयका डिएसपी छेदीलाल कामतीका अनुसार २९ वर्षीय विवेन्द्र नेपालीले ०७८ असार २५ गते आफूलाई जातीय विभेद गरेको भन्दै तत्कालीन वडाध्यक्ष ५५ वर्षीय कालीबहादुर बुढा र उहाँका छोरा नवीन बुढा विरुद्ध जिल्ला प्रहरी कार्यालयमा उजुरी दिनुभएको थियो । आरोपितहरूलाई प्रहरीले सोही दिन गिरफ्तार गरेको थियो ।

जिल्ला अदालतले पूर्व वडाध्यक्ष कालीबहादुरलाई सफाइ दिएको थियो भने नवीनलाई चार महिना कैद सजाय, २० हजार रुपियाँ जरिबाना र २५ हजार रुपियाँ क्षतिपूर्ति भराउने फैसला गरेको थियो । पीडितले सोही घटना ०७८ साउन २७ गते उच्च अदालत सुर्खेत, जुम्लामा मुद्दा दर्ता गर्नुभएको थियो । उच्च अदालतले ०८० जेठ १८ गते उक्त मुद्दामा फैसला गर्दै नवीन बुढालाई तीन महिना २० दिन कैद सजाय र २० हजार रुपियाँ जरिबाना भराउने फैसला गरेको थियो ।

उच्च अदालतको फैसलापछि नवीन फरार रहेको डिएसपी कामतिले बताउनु भयो । फरार नवीनलाई गिरफ्तार गरी जिल्ला अदालतमा बुझाएको र सोही दिन अदालतले सजाय भुक्तानका लागि जिल्ला कारागार कार्यालयमा पठाएको जिल्ला प्रहरी कार्यालयका डिएसपी कामतिले जानकारी दिनुभयो ।

मानदत्त रावल