समाचारहरू

निसिखोला गाउँपालिका–२ देविस्थानका ५१ वर्षीय ओमबहादुर रसाइलीलाई जातीय विभेद गरेको आरोपमा प्रहरीले ढोरपाटन नपा–५ अधिकारीचौरका ३२ वर्षीय लोकबहादुर बुढालाई माघ ८ गते गिरफ्तार गरेको छ ।

माघ ७ गते स्थानीय खड्कबहादुर पुनकी छोरीको विवाह भोजमा आरोपित बुढाले दलित र गैरदलितको छुट्टाछुट्टै भोजको व्यवस्था भएपनि गैरदलितको भोजमा प्रवेश गरेको भन्दै रसाइलीलाई लखेटेपछि पीडित पक्षले माघ ८ गते इलाका प्रहरी कार्यालय, बुर्तिवाङमा लिखित उजुरी दिएको छ ।

पीडितको उजुरीपछि प्रहरीले बुढालाई सोही दिन नै गिरफ्तार गरेको थियो । पीडितको उजुरीमाथि कानुनी रूपमा प्रक्रिया अगाडि बढाइएको इलाका प्रहरी कार्यालय, बुर्तिबाङका इन्स्पेक्टर ओमप्रकाश यादवले बताए ।

घटनामा अनुसन्धान तथा कानुनी प्रक्रियाका लागि आरोपित बुढालाई माघ ९ गतेनै जिल्ला सदरमुकाम झिकाइएको जिल्ला प्रहरी कार्यालय, बागलुङले जनाएको छ ।

नेपालको संविधान २०७२ को मौलिक हक अन्तर्गत धारा २४ मा कुनै पनि व्यक्तिले सार्वजनिक वा निजी स्थलमा कसैलाई जातीय विभेद तथा छुवाछुत गर्न नहुने र त्यस्तो कार्य गरेमा कानुन बमोजिम दण्डनीय अपराध हुने भनिएको छ ।

त्यसैगरी छुवाछुत कसुर तथा सजाय ऐन २०६८ मा समेत कसैले कसैलाई सार्वजनिक वा निजी स्थालमा जातीय विभेद तथा छुवाछुत गरेमा दण्डनीय अपराध हुने र दोषीलाई ३ महिनादेखि ३ वर्षसम्म कैद वा २५ हजार रुपियाँसम्म जरिबाना हुने व्यवस्था रहेको छ ।

सिर्जना पन्त