समाचारहरू

गोडैता नगरपालिका–११ सिसौटियाका ३३ वर्षीय रामवरण महरा चमारलाई जातीय विभेद गरेको आरोपमा सोही वडाका ४४ वर्षीय दिलीप कुमार यादवविरुद्ध पीडित पक्षले जिल्ला प्रहरी कार्यलय मलंगवामा ०८० असोज १६ गते उजुरी दिनु भएको छ ।

आरोपित यादवले ०८० असोज २ गते जातीय विभेद तथा छुवाछुत र कुटपिट समेत गरेको भन्दै पीडितले आरोपित विरुद्ध जिल्ला प्रहरी कार्यालय मलंगवामा उजुरी दिएको पीडितले बताउनु भयो ।

पीडित गोडैता नगरपालिका–८ स्थित बजारदेखि दक्षिणतर्फ रहेको नहरमा कपडा धोइ रहेको बखत मोटरसाईकल सफा गर्न आएका आरोपितले “तँ पानीबाट बाहिर आइज, तँ चमार, तँ दलित” भनी जातीय विभेद तथा छुवाछुत जस्ता अमानवीय व्यवहार गर्नुका साथै कुटपिट समेत गरेको पीडितको आरोप रहेको छ । तर, आरोपितका ६७ वर्षीय बुबा चन्देश्वर यादवले आरोपितले पीडितलाई “मैले पानी लिएपछि तिमी कपडा धोनु” मात्र भनेको र कुटपिट पनि नगरेको बताउनु भयो ।

पीडितको घाउ जाँच सर्लाही जिल्ला अस्पताल मलंगवामा असोज १६ गते भएको डा. नवलकिशोर झाले जानकारी दिनु भयो ।

घटना पश्चात आरोपित फरार रहेकोले खोज तलास तथा अनुसन्धान भइरहेको जिल्ला प्रहरी कार्यालय मलंगवाका डिएसपी दिपेन्द्र पंजियार थारुले जानकारी दिनु भयो ।

बुधन साह