जातीय विभेद घटनाका आरोपित गिरफ्तार

  ०७९ माघ ३ गते

जातीय विभेद गरेको आरोपमा प्रहरीले रास्कोट नगरपालिका– १ का ३० वर्षीय अशोक शाही, उहाँकी  पत्नी २७ वर्षीया सविना शाहीलाई माघ २ गते गिरफ्तार गरेको छ ।

शाही र शाहीको पत्नीले आफूलाई जातीय विभेद गरेको भन्दै रास्कोट नगरपालिका –५ निवासी साझा खबर अनलाइनमा कार्यरत पत्रकार एवम् अधिकारकर्मी ३५ वर्षीय वीर तिरुवाले जातीय विभेद गरेको आरोपमा पुस ८ गते जिल्ला प्रहरी कार्यालय कालिकोटमा उजुरी दिनु भएको थियो ।

पीडितलाई आरोपितले पुस ६ गते सार्वजनिक स्थलमा ‘विभेदित शब्द’ प्रयोग गर्दै गाली गर्नुका साथै अपमान गरेको पीडितले आरोप लगाउनु भएको थियो ।

पीडितको निवेदन अनुसार आरोपितहरूले सामाजिक सञ्जाल फेसबुकमार्फत पनि जातीय विभेद हुने खालका विभिन्न अश्लील शब्दहरू प्रयोग गर्दै गाली गलौज गरेपछि अनुसन्धानका लागि प्रहरीले गिरफ्तार गरेको कालिकोटका डीएसपी जयश्वर रिमालले इन्सेक प्रतिनिधिलाई जानकारी गराउनु भएको छ ।

जातीय विभेद तथा दुर्व्यवहार गरेको भन्दै पीडितपक्षबाट जातीय छुवाछुत तथा दुर्व्यवहार सम्बन्धी उजुरी दिनु भएको थियो ।

नेपालको संविधान २०७२ को धारा ४० मा दलितको हक र धारा २४ मा छुवाछुत तथा जातीय विभेद विरुद्धको हकको व्यवस्था गरिएको छ ।

यस्तै कसैले जातीय भेदभाव तथा छुवाछुत गरेमा मुलुकी अपराध संहिता २०७४ को दफा–१६६ उपदफा (१) अनुसार तीन वर्षसम्म कैद वा ३० हजार रुपियाँसम्म जरिबाना वा दुवै सजाय हुने व्यवस्था गरिएको छ ।


कालीबहादुर मल्ल