जातीय विभेद गरेको कसुरमा तीन महिना कैद सजायको फैसला

  ०८१ माघ १० गते

सामाजिक सञ्जालमा जातीय विभेदजन्य शब्द लेखेको कसुरमा दैलेखको महावु गाउँपालिका–४, फागुका ४२ वर्षीय शिक्षक तर्कबहादुर सिंह ठकुरीलाई जिल्ला अदालतले तीन महिना कैद सजायको फैसला गरेको छ ।

जिल्ला अदालत सुर्खेतका न्यायाधीश दीपक ढकालको ०८१ माघ ९ गते को इजलासले तीन महिना कैद सजाय र ३० हजार रुपियाँ भराउने फैसला गरेको जिल्ला अदालत सुर्खेतका श्रेस्तेदार निर्मलाकुमारी खड्काले जानकारी दिनुभयो ।

तत्कालीन कर्णाली प्रदेश प्रमुख तिलक परियारले निजी सचिवालयमा दलितहरू मात्र राखेको विषयमा महाबु गाउँपालिका–३ बाँसीका बिनोद बुढाले लेखेको फेसबुक स्टाटसमा शिक्षक ठकुरीले ‘डुमैडुम मात्र रहेछन्’ भनी कमेन्ट लेखेका थिए । जातीय विभेद हुने गरी सिंगो दलित समुदायको आत्मसम्मानलाई चोट पुर्‍याउने सामाजिक सद्भाव भड्काउने कार्य गरेको भन्दै दलित अधिकारकर्मी गम्भिरसिंह भुलले साउन ८ गते जिल्ला प्रहरी कार्यालयमा ‘जातीय भेदभाव तथा छुवाछुत कसुर’ अन्तर्गत आरोपित विरुद्ध उजुरी दिनुभएको थियो । ठकुरीलाई प्रहरीले साउन ११ गते गिरफ्तार गरेको थियो ।


जगतदल जनाला विक