समाचारहरू

राष्ट्रिय मानव अधिकार आयोगले जातीय भेदभाव तथा छुवाछुतको अवस्था विषयक जिल्लास्तरीय अन्तरक्रिया कार्यक्रम फागुन १९ गते चौतारामा सम्पन्न गरेको छ ।

आयोगले दुई दिनसम्म विभिन्न गाउँ स्तरमा जातीय भेदभावको अवस्था अनुगमन गरेर जिल्लामा रहेका सरोकारवालाहरूबिच अन्तरक्रिया गरेको आयोगका अधिकृत सोमराज सुवेदीले बताए ।

अन्तरक्रियामा प्रमुख जिल्ला अधिकारी अन्तरबहादुर सिल्वालले मानवले मानवीय व्यवहार गरिनु पर्छ भन्ने उद्धेश्यले नै मानव अधिकार कानुन आएको बताए । उनले भने-'कानुनले छुवाछुतलाई बर्जित गरेको छ ।'

तर, समाजमा छुवाछुतको समूल अन्त्य हुन सकेको छैन । दलित अधिकारकर्मी विक्रम सुन्दासले समाजमा छुवाछुत लुकाइएको छ भन्दै राजनितिक दलको बैठक हुँदा दलितको घरमा पनि नबस्ने र दलितले गैरदलितको घरमा कोठासमेत नपाउने गरेको गुनासो गरे ।

कार्यक्रममा जिल्ला प्रहरी कार्यालयका प्रमुख एसपी रविन्द्र केसी, सरकारी वकिल, स्थानीय विकास अधिकारीलगायत अन्य विभिन्न गैरसरकारी सङ्घ संस्थाका प्रतिनिधिहरूले समेत जिल्लामा छुवाछुतको अवस्था औँल्याएका थिए ।

यस कार्यक्रमले जातीय छुवाछुतको अन्त्य गराउन केही मद्धत पुग्ने विश्वास गरिएको गरेको राष्ट्रिय मानव अधिकार आयोगका अधिकृत सोमराज सुवेदीले बताए ।

नतिबावु धिताल