जातीय छुवाछुत गरेको कसुरमा कैद र जरिबानाको फैसला

  ०७८ चैत २३ गते

बोदे बर्साइन नगरपालिका–८ काचनका ४२ वर्षीय लिलाधर दास तत्मा र ३५ वर्षीया पत्नी दुखनीदेवी दास तत्मालाई जातीय छुवाछुत गरेको कसुरमा सप्तरी जिल्ला अदालतले सोही ठाउँका पाँच जनालाई चैत २१ गते कैद र जरिबानाको सजाय गरेको छ ।

न्यायाधीश प्रमेश पोखरेलको इजलासले बोदे बर्साइन नगरपालिका–८ काचनका ४५ वर्षीय राजकुमार यादव, ३० वर्षीय काशिन्द्र यादव, ५५ वर्षीय रामचन्द्र यादव, ४२ वर्षीय सकलदेव यादव र ४१ वर्षीय जितेन्द्र साहलाई जनही पाँच महिना कैद र ५ हजार रुपियाँ जरिबाना तथा पीडितहरूलाई ५०/५० हजार रुपियाँ क्षतिपूर्ति भराउने फैसला गरेको अदालतका सूचना अधिकारी भरतमणी पोखरेलले बताउनु भयो ।

तत्मा दम्पतिलाई ०७४ असार १३ गते साँझ बोदे बर्साइन नगरपालिका–८ काचनस्थित ग्राम डिहवार थान मन्दिरमा असारी पूजा गर्न गएका बेला आरोपितहरूले तल्लो जातको भनेर कुटपिट गरेको भन्दै पीडित पक्षले सोही दिन इलाका प्रहरी कार्यालय बोदे बर्साइन र ०७४ असार १४ गते जिल्ला प्रहरी कार्यालयमा उजुरी दिएको थियो ।

पूजा गर्न मन्दिर गइरहेका बेला ‘तँ कथित तल्लो जात मन्दिरभित्र पस्न खोज्ने’ भनेर आरोपितहरूले कुटपिट गर्दै पुजाको समान समेत फालिदिएको पीडितहरूको आरोप थियो ।

कुटपिटबाट लिलाधरको कुमको हड्डी भाँचिएको थियो भने दुखनीको शरीरमा चोटपटक लागेको थियो ।

घाइते लिलाधरको राजविराजस्थित गजेन्द्रनारायण सिंह अस्पताल र विराटनगरमा उपचार गरिएको थियो । विराटनगरमा लिलाधरको कुमको शल्यक्रिया गरिएको उहाँले बताउनु भयो । पीडितहरूको घाउजाँच परीक्षण राजविराजस्थित जिल्ला अस्पतालमा ०७४ असार १५ गते गरिएको थियो ।

जिल्ला प्रहरी कार्यालयले आरोपितहरू विरूद्ध ०७४ असार १४ गते जातीय छुवाछुत र कुटपिट अङ्गभङ्गमा उजुरी दर्ता गरेको थियो ।

आरोपितहरू हालसम्म गिरफ्तार भएका छैनन् । ‘फरार’ रहेका आरोपितहरूविरूद्ध जिल्ला अदालतले ०७४ भदौ २८ गते म्यादी पुर्जी जारी गरेको थियो ।


मनोहरकुमार पोखरेल