जलाउँदै गरेको शव प्रहरीद्वारा नियन्त्रण, घटनाको अनुसन्धान सुरु

  ०७९ असार १६ गते

बहुदरमाई नगरपालिका–७, बिश्रामपुर टोलकी १५ वर्षीया महिमाकुमारी साह कलवारलाई आफ्नै परिवारका सदस्यले कुटपिट गरेका कारण मृत्यु भएको आरोपमा प्रहरीले बहुदरमाई नगरपालिका–७, छपकैयाबाट जलाइरहेको शव असार १५ गते राति नियन्त्रणमा लिएको छ ।

जलाइरहेको खबर प्रहरीलाई पुगेपछि प्रहरीले श्यामबहादुर साह कलवारकी छोरी महिमा कुमारीको शरीरको आधा भाग जलेको अवस्थामा नियन्त्रणमा लिएको हो ।

शवलाई मोटरसाइकलमा राखेर र दाउरा टेम्पोमा राखेर जलाउन लगिएको थियो । सो मोटरसाइकल र टेम्पो पनि नियन्त्रणमा लिएको प्रहरीले जनाएको छ ।

शङ्कास्पद रुपमा बालिकाको शव राति करिब ११ बजे आधा जलेको अवस्थामा नियन्त्रणमा लिइएको जिल्ला प्रहरी कार्यालय पर्साका डिएसपी प्रल्हाद कार्कीले बताउनु भयो । शव पोस्टमार्टमको लागि वीरगंजस्थित नारायणी अस्पतालमा राखिएको उहाँले बताउनु भयो ।

घटनाबारे सोधपुछको लागि मृतकका परिवारका तीन जनालाई नियन्त्रणमा लिइएको डिएसपी कार्कीले बताउनु भयो । मृत्युको कारणबारे प्रहरीले अनुसन्धान गरिरहेको उहाँले बताउनु भयो ।

मृतक बालिकाका बुबा भने ‘फरार’ रहेको प्रहरीले जनाएको छ । गिरफ्तार भएकाहरूले पनि मृत्युको विषयमा फरकफरक कुरा बताइरहेको प्रहरीको भनाई छ ।

‘अनुसन्धान गर्दैछौँ ।’–डिएसपी कार्कीले भन्नु भयो–‘अहिले नै केही भनी हाल्न मिल्ने अवस्था छैन ।’


कृष्णचन्द्र लामिछाने