जलविद्युत आयोजना पुनर्निर्माण हुँन नसक्दा सेवाग्राही मार्कामा

 

गत  असोज ३० गतेदेखि कात्तिक २ गतेसम्म आएको अविरल वर्षाका कारण आएको बाढीले साइलीगाड जलविद्युत आयोजना भत्काएपछि पुनर्निर्माण हुँन नसक्दा आर्दश गाउँपालिका–६ गिरीचौकाका स्थानीयहरुले सास्ती खेप्दै आएका छन् ।

वर्षाका कारण आएको बाढीले जलविद्युत आयोजना भत्काएको झण्डै ६ महिना वितिसक्दा समेत सरकारले पुनर्निर्माण नगरि दिएका कारण आर्दश गाउँपालिकाका १ हजार १ सय घरदुरीका ७ हजार बढी स्थानीयबासी अन्धकारमा बस्न बाध्य भएका हुन ।

विधुत अभावका कारण स्थानीयको दैनिकी कष्टकर हुनुका साथै विद्यार्थीहरुकोे पढाइमा समेत समस्या हुने गरेको स्थानीय नारु खडायतले गुनासो गर्नु भयो ।

उहाँले खाना बनाउँदा तेलको दियोले उजालो बनाएर समस्या समाधान गर्ने गरेको भएपनि बालबालिकाहरुको पढाइमा निकै समस्या उत्पन्न भएको बताउनु भयो ।

विधुत अभावका कारण विद्यार्थीहरुको पठनपाठनमा समस्या हुनका साथै विद्यालयको प्रशासनीय कार्यमा समेत समस्या उत्पन्न भएको गिरीचौका माध्यमिक विद्यालयका प्रधानध्यापक नरबहादुर खडायतले बताउनु भयो ।

उहाँले कयौँ विद्यार्थीहरु गृहकार्य नगरेरै विद्यालय आउने गरेको बताउँदै नजिक आउँदै गरेकोे एसइइ परीक्षामा समेत यसको नकारात्मक प्रभाव देखिने बताउनु भयो ।

विद्युत अभावका कारण पानी घट्ट र मिल सञ्चालनमा नआउँदा कुटानी पिसानीमा समेत समस्या हुने गरेको स्थानीय महेन्द्र बिकले गुनासो गर्नुृ भयो ।

उहाँले स्थानीय सरकारलाई समस्या सामाधान गर्नका लागि पटकपटक अनुरोध गरिएको भएपनि समयमै स्थानीय सरकारले ध्यान नदिदा आफूहरुले सास्ती खेप्नु परेको बताउनु भयो ।

बाढीका कारण भत्कीएको विद्युत आयोजना पुनर्निर्माण गर्नका लागि प्रक्रिया अगाडि बढी सकेकोले छिट्टै समस्या समाधान हुँने आदर्श गाउँपालिका–६ का अध्यक्ष लालबहादुर खडायतले बताउनु भयो ।

उहाँले वडा कार्यालयबो बजेटबाट ५ लाख रुपियाँ बजेट विद्युत आयोजना पुनर्निर्माणका लागि विनियोजन गरिएकोले चाडो भन्दा चाडो स्थानीयहरुले भोग्दै आएको समस्या समाधान हुने बताउनु भयो ।

आदर्श गाउँपालिका भरी केन्द्रीय प्रशारण लाइन जोड्ने कार्य भइसकेको र गिरीचौकामा मात्रै केन्द्रीय प्रशारण लाइन जोडन बाँकी रहेकोले सो कार्य पनि अगाडि बढाउन पहल भइरहेको आदर्श गाउँपालिकाका अध्यक्ष रामबहादुर रोकायाले बताउनु भयो ।

उहाँले विद्युत कार्यालयसँग छलफल भइरहेकाले एक वर्ष भित्रै आदर्श गाउँपालिका क्षेत्रका गाउँ र टोलमा विद्युत सेवा पुर्याउने प्रतिवद्घता जाहेर गर्नु भयो ।


गणेश जोशी