समाचारहरू

विभिन्न मुद्दामा कैद भुक्तान गरिरहेका आमाहरूसँग आश्रति इलाम जिल्ला कारागारमा रहेका बालबालिकाको जन्म दर्ता नहुँदा उनीहरूलाई पढाउन समस्या भएको कारागार प्रशासनले जनाएको छ । आमाको नागरिकता नभएकाले र केहीको आमा जेल परेपछि बाबु सम्पर्कमा नरहेकाले ती बालबालिकाको जन्म दर्ता गराउन समस्या भएको कारागार प्रमुख सिर्जना लुईंटेलले बताइन् ।

जिल्ला कारागारमा अहिले तीन वर्षीय अञ्जान बस्नेत, चार वर्षीया स्मृति राई, दुई वर्षीय इश्वर श्रेष्ठ र तीन वर्षीय निसान राईको जन्म दर्ता नहुँदा विद्यालय जाने उमेरमा समस्या आएको लुईंटेलले जानकारी दिइन् ।

'यी बालबालिकाको आमाको पनि नागरिकता छैन । बाबुको पत्तो छैन । अब कसरी जन्मदर्ता गराउने भन्ने समस्यामा छौं । उनीहरूको जन्मदर्ता सम्बन्धित जिल्ला र गाविसका गाविस सचिवहरू कारागारमै आएर बनाइदिए एउटा विकल्प हुनसक्छ ।'-उनले भनिन् -'अन्य जिल्लाका बालबालिकाको जन्म दर्ता गर्न गाविस सचिवहरू यहाँ आउन पनि सम्भावना हुँदैन कि !' यी बालबालिकाका आमाहरू हिमा बस्नेत, पम्फा राई र जुनु श्रेष्ठको नागरिकता पनि नभएको लुईंटेलले बताएकी छन् ।

'कारागारमा आश्रति बालबालिकालाई पढाइ दिने थुप्रै सङ्घसंस्था आउँछन् । तर, उनीहरूले पनि जन्मदर्ता खोज्ने हुँदा विद्यालय जान उमेर पुग्दै गएका बालबालिकाको जन्म दर्ता कसरी बनाएर पढ्न पठाउने भन्ने अन्योल भएको छ ।'-कारगार प्रमुख लुईंटेलले भनिन् ।

कोकिला ढकाल