समाचारहरू

जनाताले सुविधा पाउने गरी संयन्त्र निर्माण गरिने कुरामा प्रदेश नं ६ का सामाजिक विकास मन्त्री दल रावलले जोड दिएका छन् ।

अनौपचारिक क्षेत्र सेवा केन्द्र (इन्सेक) को समन्वयमा फागुन १७ गते सङ्घीयतामा स्वास्थ्यका प्राथमिकता तथा प्रारुप विषयक छलफल कार्यक्रममा सामाजिक विकास मन्त्री रावलले उक्त कुरामा जोड दिएका हुन् ।

मन्त्री रावलले कर्णालीमा सुत्केरी महिलाको उद्धारका लागि 'एयर एम्बुलेन्स' सञ्चालन गर्ने योजना रहेको बताए ।

तत्कालका लागि भाडा प्रयोग गरेर भए पनि काम गर्ने र भविष्यका लागि सरकारले आफ्नै लगानीमा एयर एम्बुलेन्स सञ्चालन गर्ने योजना रहेको उनले बताए ।

छुट्टै कार्यदल गठन गरी कुनै पनि नेता र मन्त्रीको सिफारिस नलाग्ने गरी बिरामीको उद्धार गरिने उनको भनाइ छ । मन्त्री रावलले आफू सामाजिक क्षेत्रमा लामो समय काम गरेको भएर पनि आफूले उक्त मन्त्रालय रोजेको बताउँदै सबैले आ-आफ्नो जिम्मेवारी निर्वाह गर्नुपर्ने बताए ।

जिल्ला जनस्वास्थ्य कार्यालय बाँकेका प्रमुख खिमबहादुर खड्काले स्वास्थ्य र शिक्षाको छुट्टै विभाग बनाएर विषय विज्ञलाई जिम्मेवारी दिनुपर्ने धारणा राखे । भेरी अञ्चल अस्पताल नेपालगञ्जका डा. बद्री चापागाईले सङ्घीयतामा स्वास्थ्य प्राथमिकता तथा प्रारुपका विषयमा सहजीकरण गरेका थिए । हालको अवस्थालाई कसरी सुधार गर्न सकिन्छ भन्ने विषयमा उनको प्रस्तुती केन्द्रीत रहेको थियो ।

छलफलमा इन्सेक नेपालगञ्ज कार्यालयका संयोजक भोला महतले विकास र सचेतनालाई सँगै लिएर अगाडि बढ्नुपर्ने बताए । उनले भौतिक निर्माणले मात्र परिवर्तन नहुने बताए ।

विनोद पाण्डे