समाचारहरू

पर्वत अस्पतालमा जनशक्ति अभावमा भिडियो एक्स–रे सेवा प्रभावित हुदाँ सेवाग्राही मर्कामा  परेका छन् ।

फलेवास नगरपालिका–१ कार्कीनेटाकी ३० वर्षीया सावित्रा विक असार १२ गते बिहान ११ बजे भिडियो एक्स–रे का लागि पर्वत अस्पताल आउनुभयो । पाठेघर परीक्षण गर्न आउनुभएकी विकलाई जव अस्पतालका नर्सहरुले सेवा बन्द रहेको कुरा जानकारी गराए अनि उहाँ निरास हुँदै फर्किनुभयो । ‘जिल्ला अस्पतालमा राम्रो र गुणस्तरीय सेवा पाइएला भनेर आएकी थिएँ, भिडियो एक्स–रे सेवा बन्द रहेछ अब कहाँ गएर एक्स–रे गर्ने हो थाहा छैन,’ उहाँले दुःख व्यक्त गर्नुभयो ।

सावित्रा मात्र होईन पछिल्लो समय पर्वत अस्पतालमा भिडियो एक्स–रे सेवा लिन आउने सेवाग्राहीहरु निराश हुँदै फर्किन थालेका छन् । जनशक्ति अभावको कारण देखाउँदै पर्वत अस्पतालमा भिडियो एक्स–रे सेवा प्रभावित बनेपछि यहाँका नागरिकहरु मर्कामा परेका हुन् । अस्पतालमा भिडियो एक्स–रे सेवा बन्द हुँदा नीजि क्लिनिकमा महँगो शुल्कमा भिडियो एक्स–रे गर्न बाध्य रहेको कुश्मा नगरपालिका– १२ कि ३५ वर्षीया सुनिता शर्माले बताउनुभयो ।

जनशक्ति अभावका कारण पर्वत अस्पतालले गत असार ४ गतेदेखि हप्ताको दुई दिन मात्र भिडियो एक्स–रे सेवा सञ्चालनमा ल्याएको छ । अस्पताल प्रशासनले सुचना नै जारी गरी हप्ताको दुई दिन सोमवार र बिहिवार सेवा सुचारु रहने जनाएको छ । उक्त भिडियो एक्स–रे सेवा पनि गर्भवती महिला र इमर्जेन्सी अवस्थामा रहेका विरामी तथा सेवाग्राहीलाई मात्र प्रदान गरिने छ ।

पर्वत अस्पताल व्यवस्थापन समितिका अध्यक्ष शंकर गिरीले जनशक्ति अभावका कारण भिडियो एक्स–रे सेवा बन्द भएको र जनशक्ति परिपूर्ति भएपश्चात सम्पूर्ण विरामीहरुलाई नियमित सेवा प्रदान गरिने बताउनुभयो । ‘भिडियो एक्स–रे सेवाका लागि अस्पतालमा एक जना एमडिजिपि डाक्टर हुनुहुन्थो, उहाँपनि सरुवा भएर बागलुङ जानुभयो, त्यसपछि समस्या भएको छ,’ अध्यक्ष गिरीले भन्नुभयो । उहाँले पर्वत अस्पतालको समस्याका विषयमा प्रदेश सरकार लगायत विभिन्न निकायमा पुगेर ध्यानाकर्षण गराएको पनि बताउनुभयो ।

सन्तोष थापा