जनशक्ति अभावमा आइसीयू र भेण्टीलेटर प्रयोगहीन

  ०८० फागुन २३ गते

जनशक्ति अभावमा जिल्ला अस्पतालमा जडान गरिएका स्वास्थ्य उपकरण सघन उपचार कक्ष (आइसीयू) र भेण्टीलेटर प्रयोगहीन भएका छन् । कोभिड-१९ को समयमा जिल्ला अस्पतालमा जडान गरिएको आइसीयूसहितको भेण्टीलेटर केही समयमा प्रयोगमा आएको थियो ।

आइसीयूसहितको भेण्टीलेटरमा कार्यरत चिकित्सक सरूवा भएपछि जिल्ला अस्पतालको आइसीयू प्रयोगहीन भएको छ । जसका कारण जिल्ला अस्पतालमा पुगेका बिरामीलाई अन्यत्र पठाउन थालिएको छ । भेण्टीलेटर सञ्चालनका लागि जनशक्ति अभाव भएपछि आइसीयू र भेण्टीलेटर सेवा चाहिने बिरामीलाई जिल्ला बाहिर पठाउन बाध्य भएको अस्पतालका प्रमुख डाक्टर प्रशान्त शाहले बताउनु भयो ।

जिल्ला अस्पतालमा जनशक्ति अभावका कारण गम्भीर बिरामीको उपचार गर्न जडान गरिएको आइसीयू सञ्चालन गर्न समस्या छ, लाखौँ रुपियाँ खर्चेर जडान भएका उपकरण त्यत्तिकै थन्किएका छन् डाक्टर शाहले भन्नुभयो । दक्ष र आवश्यक जनशक्ति नहुँदा नियमित रूपमा आइसीयू सञ्चालनमा ल्याउन नसकिएको अस्पतालले जनाएको छ ।

आइसीयू कक्ष नियमित रूपमा सञ्चालन गर्नका लागि कम्तीमा एक-एक जना इण्टरनल मेडिसिन र बेहोस बनाउने डाक्टर (एनएस्थिसियोलोजिस्ट) आवश्यक पर्ने भए पनि सो जनशक्ति नरहेकाले आइसीयू र भेण्टीलेटर सञ्चालनमा ल्याउन नसकिएको डाक्टर शाहको भनाइ छ ।

दक्ष जनशक्ति प्रदेश सरकारसँग माग गरेको भएपनि प्रदेश स्वास्थ्य मन्त्रालयले जबाफ नदिएका कारण एक महिनायता आइसीयू र भेण्टीलेटर प्रयोगविहीन भएको अस्पताल प्रशासनले जनाएको छ ।


अञ्जु कार्की