जनशक्तिको अभावले अस्पताल पाँच महिनादेखि बन्द हुँदा सेवाग्राही मर्कामा

 

शुक्लागण्डकी नपा–११ साँखेस्थित फूलबारी अस्पताल पाँच महिनादेखि बन्द हुँदा सेवाग्राही मर्कामा परेका छन् ।

जनशक्ति अभाव भन्दै पाँच महिनादेखि अस्पताल बन्द हुँदा सो क्षेत्रका स्थानीयबासी स्वास्थ्य उपचारबाट समेत वञ्चित भएका छन् । दसँैपछि सो अस्पतालका सम्पुर्ण सेवाहरू पुर्ण रूपमा बन्द भएको स्थानीयले बताए ।

शुक्लागण्डकी नपा–११ का वडा अध्यक्ष दलबहादुर थापाले आवश्यक जनशक्ति नहुँदा अस्पतालको सेवा बन्द भएको जानकारी दिए ।

सङ्घीय सरकारले अस्पताललाई १५ शैयाको अस्पताल भनी मान्यता दिएपनि आवश्यक दरबन्दीको व्यवस्था नगर्दा सेवा बन्द भएको थापाले बताए ।

अस्पतालमा अहिले दुईजना कार्यालय सहयोगीले आलोपालो गरी सरसफाई गर्दै आएपनि सेवा भने पुर्ण रूपमा बन्द भएको वडा अध्यक्ष थापाले बताए ।

२०५५ फागुनमा जर्मन संस्था इभी कास्यलको सहयोगमा स्थापना भई साविक राईपुर गाविसको छब्दी र भक्कलमा फूलबारी सेवा केन्द्रका रूपमा सञ्चालनमा रहेको सो स्वास्थ्य संस्था ०६५ सालदेखि साँखेमा फुलबारी अस्पतालको रूपमा सञ्चालन भइरहेको थियो ।

सो अस्पतालबाट तनहुँको शुक्लागण्डकी नगरपालिका र स्याङजाको बिरूवा, हरिनास गाउँपालिका र पुतलीबजार नगरपालिका जनताले स्वास्थ्य सेवा लिँदै आएका थिए ।

१५ शैयाको अस्पतालमा २४ जना स्वास्थकर्मीको दरबन्दी आवश्यक हुनेमा सङ्घीय सरकारले आवश्यक दरबन्दी उपलब्ध नगराउँदा अस्पतालको सेवा ठप्प हुन पुगेको शुक्लागण्डकी नगरपालिकाका प्रमुख किसान गुरुङले बताए ।

अस्पताल बन्द हुँदा करौडौँ रुपियाँ खर्चिएर बनाइएको अस्पतालको भवन, यन्त्र, उपकरण र औषधि प्रयोगविहीन बनेको छ ।

सरकारले दरबन्दी नदिएपछि नगरपालिकाले नै बजेट व्यवस्थापन गरेर केही दिन भित्रैमा तीन जना स्वास्थ्यकर्मी राखेर सेवा सुचारू गर्ने तयारी गरेको वडा अध्यक्ष थापाले बताए ।

केही दिन भित्रैमा एक जना एमबिबिएस डाक्टर, स्टाफ नर्स र ल्याब टेक्निसियनको अस्थायी दरबन्दी स्वीकृत गरेर नगरस्तरीय अस्पतालका रूपमा सञ्चालन गर्ने निर्णय गरेको थापाको भनाई छ ।

सो अस्पतालको सेवा बन्द हुँदा बिरामीहरू सामान्य उपचारको लागि शुक्लागण्डकी नपा–१० स्थित स्वास्थ्य चौकीमा जाने गरेको र गम्भीर प्रकृतीका बिरामीहरूलाई दुलेगौँडा र पोखरा जानु पर्ने बाध्यता रहेको स्थानीय भिमबहादुर थापाले बताए ।

अस्पताल सञ्चालन हुँदा दैनिक १ सय देखि २ सय ५० जनासम्म बिरामीले स्वास्थ्य उपचारको सेवा लिँदै आएको वडा अध्यक्ष थापाले बताए ।


प्रकाशचन्द्र भट्टराई