समाचारहरू

अधिकार क्षेत्र बाहिर गई बिरामीलाई भर्ना गरी उपचार गरेको आरोपमा प्रहरीले ब्यास नगरपालिका–३ परासरटोलमा प्रजुन थापा मेडिकल हल सञ्चालन गर्ने ५२ वर्षीया बिष्णु कुमारी गरौजा मगर र कैलाली जिल्ला भजनी नगरपालिका–६ दौनहिया घर भई ब्यास नगरपालिका–३ अनसनचौतारीमा मित्रता स्वास्थ्य क्लिनिक सञ्चालन गरेका ४५ वर्षीय चन्द्र बहादुर चौधरीलाई ०८० असोज ११ गते व्यास नगरपालिका–३ दमौलीबाट गिरफ्तार गरेको छ ।

जिल्ला प्रशासन कार्यालय तनहुँ, ब्यास नगरपालिका, स्वास्थ्य कार्यालय तनहुँ, दमौली अस्पताल, उद्योग वाणिज्य संघ तनहुँ, जिल्ला प्रहरी कार्यालयको अनुगमन टोलीले असोज ११ गते अनुगमन गर्दा अधिकार क्षेत्र भन्दा बाहिर गई बिरामीको उपचार गरेको पाइएपछि गरौजा मगर र चौधरीलाई प्रहरीले गिरफ्तार गरेको हो ।

गरौंजा मगरले प्रजुन थापा मेडिकल हलको नाममा क्लिनिक दर्ता नगरी फार्मेसीमा बिरामी जाँच गरेको तथा बिरामीलाई इन्जेक्सन मार्फत उपचार गराएको अनुगमनमा भेटिएको थियो भने चौधरीले सञ्चालन गरेको मित्रता स्वास्थ्य क्लिनिकमा डाक्टर नभएको, आफै औषधि सिफारिस गरेको, डेंगु पोजेटिभ बिरामीहरुलाई इन्जेक्सन, ट्याबलेट र एन्टिबायोटिकको माध्यमबाट उपचार गराएको भेटिएपछि गिरफ्तार गरिएको जिल्ला प्रहरी कार्यालयका डिएसपी मोहनबहादुर खाँडले जानकारी दिनु भयो ।

गिरफ्तार भएकाहरुलाई इलाजसम्बन्धी कसुरमा तनहुँ जिल्ला अदालतबाट चार दिनको म्याद थप गरि अनुसन्धान सुरु गरिएको डिएसपी खाँडले बताउनु भयो ।

प्रकाशचन्द्र भट्टराई