समाचारहरू

सुन्दरहरैँचा नगरपालिका-७ की एक वर्षीया बालिका अर्पणा र तीन वर्षीया बालिका आयिङ्का कार्कीको भदौ १५ गते हत्या गरेको आरोपमा प्रहरीले बालिकाद्वयकी आमा २९ वर्षीया अस्मिता न्यौपानेलाई गिरफ्तार गरेको छ ।

घरायसी विवादका  क्रममा र निर्माणाधीन अवस्थामा रहेको घरमा पानी नहालेको विषयमा ०८१ भदौ १४ गते ३१ वर्षीय पति अर्जुन कार्कीसँगको झगडाको रिस साँध्न दुई जना छोरीको विष सेवन गराइ हत्या गरेको आरोपमा प्रहरीले अस्मितालाई भदौ १९ गते झापाको विर्तामोडबाट गिरफ्तार गरेको हो ।

पतिपत्नीबिच ०८१ भदौ १४ गते विवाद भएपछि छोरी लिएर अस्मिता हराएको भन्दै अर्जुनले पत्नी र छोरीको खोजीका लागि भदौ १५ गते इलाका प्रहरी कार्यालय, वेलवारीमा उजुरी दिएका थिए ।

सुन्दरहरैँचा नगरपालिका-७ स्थित केराघारीभित्र ०८१ भदौ १६ गते शङ्कास्पद अवस्थामा एक वर्षीया बालिका अर्पणा र तीन वर्षीया बालिका आयिङ्का कार्कीको शव फेला परेको थियो ।

घटनास्थलमा विषका बट्टा भेटिएको र आमा नभेटिएकाले प्रहरीले हत्या भएको अनुमानसहित अनुसन्धान प्रक्रिया अघि बढाएको जिल्ला प्रहरी कार्यालयका डिएसपी ज्ञानेन्द्रबहादुर बस्नेतले बताउनु भयो ।

घटनाका आरोपित अस्मितालाई झापाको विर्तामोड नगरपालिका-५ स्थित पूर्वपश्चिम राजमार्गमा रहेको एभरेष्ट बैङ्क नजिकबाट भदौ १९ गते अनुसन्धानका लागि गिरफ्तार गरिएको डिएसपी बस्नेतले बताउनु भयो ।

कमजोर शारिरीक अवस्थामा भेटिएकाले अस्मिताको कोशी अस्पताल विराटनगरमा भदौ १९ गतेबाट उपचार थालिएको प्रहरीले जनाएको छ ।

पत्नी र दुई जना छोरीसहित सुन्दरहरैँचा नगरपालिका-७ मालती टोलस्थित दिदी सीता रेग्मीको घरमा अर्जुनको परिवार बस्दै आएको प्रहरीले जनाएको छ ।

घरायसी विवादले उग्ररूप लिएपछि पतिसँगको रिस साँध्न दुई जना छोरीलाई आमाले मेटासिट खुवाएर हत्या गरेको हुन सक्ने अनुमान प्रहरीले गरेको छ ।

घटनाका आरोपित अस्मिताले पति अर्जुनलाई तेरो छोरीलाई मारे, अब म पनि मर्छु भनि मोवाइलमा म्यासेज पठाएकाले घटना हत्या नै भएको प्रहरीको अनुमान छ ।

मृतक दुवै बालिकाको वीपी कोइराला स्वास्थ्य विज्ञान प्रतिष्ठान धरान, घोपामा भदौ १७ गते  पोस्टमार्टम गरिएको छ ।

पीडित पक्षले शव बुझी सोही दिन सद्गत गरेको छ ।

घटनाको प्रकृति हेर्दा विषखुवाएर दुवै बालिकाको हत्या गरेजस्तो देखिएपनि स्वतन्त्र पुष्टि हुन बाँकी रहेको प्रहरीले जनाएको छ । पोष्टमार्टम रिपोर्टपछि विष सेवन गराएर हत्या गरिएको हो वा होइन खुल्ने प्रहरीको भनाइ छ ।

विनोद सुवेदी