समाचारहरू

२३ महिनाकी छोरी प्रिन्सिका भन्डारीको हत्या गरेको आरोपमा प्रहरीले काभ्रे जिल्ला पनौती नगरपालिका–३ घर भई कोन्ज्योसोम गाउँपालिका–३ दलचोकी बस्दै आएकी २१ वर्षीया प्रमिला भन्डारीलाई भदौ २४ गते गिरफ्तार गरेको छ ।

प्रमिलाले ०८१ साउन २७ गते साँझ ५ बजेतिर आफ्नै घरबाट २३ महिनाकी छोरी प्रिन्सिका भन्डारी हराएको भन्दै प्रहरी वृत्त चापागाउँमा निवेदन दिएकी थिइन् । हराएकी बालिकाको खोजतलास गर्ने क्रममा साउन २८  गते बिहान साढे ८ बजेतिर उनको घर नजिकै सिलिङ्गेबेसी आँपबोटमा रहेको ठोस्ने खोलामा बालिकाको शव भेटिएको थियो ।

पानीमा डुबेको रुखको हाँगामा अड्किएको अवस्थामा शव भेटिएको प्रहरीले जनाएको छ । शवको पोष्टमार्टम साउन २८ गते पाटन अस्पतालमा गरिएको अस्पतालका निर्देशक प्राध्यापक डाक्टर रवि शाक्यले जानकारी दिनु भयो ।

शवको प्रकृति र पोष्टमार्टम रिपोर्ट शङ्कास्पद देखिएपछि प्रहरीले थप अनुसन्धान अघि बढाउने क्रममा आमा प्रमिलाले छोरीको हत्या गरेको खुलेको पाइएको प्रहरी परिसर ललितपुरका एसपी नरेशराज सुवेदीले बताउनु भयो ।

आरोपितले छोरीलाई हिर्काउँदा बेहोस भएपछि खोलामा फालेको स्वीकार गरेको एसपी सुवेदीले बताउनु भयो ।

दीपकप्रसाद घिमिरे