समाचारहरू

माइ नगरपालिका–२ का ५२ वर्षीय चन्द्रप्रसाद आचार्यको मृत्यु हुँदा दलितसँग बिवाह गरेको आरोपमा छोरीलाई अन्तिम संस्कारमा प्रवेश नदिनेविरूद्ध जिल्ला अदालतले पुस ७ गते क्षतिपूर्ति र जरिबानाको फैसला सुनाएको छ ।

न्यायाधीश हरिशचन्द्र इङ्गनामको पुस ७ गतेको आदेशले दोषीहरूलाई जनही ५ हजार रुपियाँ जरिबाना र पीडितले पाउने गरी ४५ हजार रुपियाँ क्षतिपूर्ति भराउन आदेश भएको अदालतका श्रेस्तेदार फणिन्द्र भट्टराईले इन्सेक प्रतिनिधिसँगको फोन सम्पर्कमा बताउनु भयो ।

पीडितले ०७७ साउन २० गते मृत्यु भएका आफ्ना बाबुको अन्तिम संस्कारमा प्रवेश नदिइएको भन्दै माइ नगरपालिका–२ की २७ वर्षीया यामकला आचार्य (विश्वकर्मा) ले माइ नगरपालिका–२ का २५ वर्षीय टीकाराम आचार्य, ३५ वर्षीया पार्वता आचार्य(दङ्गाल) र ४५ वर्षीया लक्ष्मी दङ्गाल विरूद्ध भदौ ५ गते जिल्ला प्रहरी कार्यालयमा उजुरी दिनु भएको थियो ।

पीडित पक्षको उजुरीपछि प्रहरीले भदौ ५ गते आरोपितहरूलाई गिरफ्तार गरी कारबाही अघि बढाएको थियो ।

आरोपितविरूद्ध जिल्ला अदालतले भदौ १५ गते ५० हजार रुपियाँ धरौटी माग गरी तारेखमा रिहा गरेको थियो ।

कोकिला ढकाल