समाचारहरू

स्थानीय तहको दोस्रो चरणका लागि असार ४ गते देशका ३५ जिल्लामा उम्मेदवारी दर्ता भएपछि हिजैबाट प्रचार अभियानलाई तीव्रता दिइएको छ । इन्सेक क्षेत्रीय कार्यालय नेपालगञ्जका अनुसार प्रदेश नम्बर पाँचका बाँके, प्यूठान र बर्दियामा प्रचार अभियान शान्तिपूर्ण तरिकाले सञ्चालन भइरहेको छ ।

बाँके जिल्ला प्रतिनिधि विनोद पाण्डेका अनुसार स्थानीय तहको निर्वाचनको सुरक्षा तयारी सम्बन्धमा असार ५ गते नेपालगञ्जमा सुरक्षा प्रमुखसँग बैठक सम्पन्न भएको छ । बाँके र बर्दियाका सुरक्षा प्रमुखको सहभागिता रहेको सुरक्षा गोष्ठीमा गृहमन्त्री जनार्दन शर्माले जनताले ढुक्कका साथ मताधिकार प्रयोग गर्न पाउनु पर्ने बताए । मन्त्री शर्माले चुनाव शान्तिपूर्ण, धाँधलीरहित र भयरहित बनाउन सुरक्षा प्रमुखलाई निर्देशन दिए ।

बैजनाथ गाउँपालिकाको वनकटवामा एमाले र माओवादी केन्द्रबीच असार ४ गते भएको झडपमा नेपाल प्रहरीका सई विश्वजीत केसी र प्रहरी जवान प्रेमबहादुर विक घाइते भएका छन् । घाइते दुबैको कोहलपुर मेडिकल कलेजमा उपचार भएको प्रहरीले जनाएको छ ।

प्यूठान जिल्ला प्रतिनिधि रविन्द्र पाण्डेका अनुसार असार ५ गते जिल्लामा क्रियाशील राजनीतिक दलले स्थानीय तहको दोस्रो चरणको निर्वाचनको प्रचारलाई तीव्रता दिएका छन् । मुख्य निर्वाचन अधिकृत वासुदेव न्यौपानेले असार ५ गतेसम्म आचारसंहिता उल्लङ्घनसम्बन्धी उजुरी नपरेको बताए ।

बर्दिया जिल्ला प्रतिनिधि मानबहादुर चौधरीका अनुसार निर्वाचन अधिकृतको कार्यालयले स्थानीय तहको दोस्रो निर्वाचनका लागि परेका उम्मेदवारहरूको नामावली प्रकाशन गरेको छ । बर्दिया जिल्लाका ६ ओटा नगरपालिका र दुई गाउँपालिकामा मनोनयन दर्ता भएकोमा असार ५ गते दावी विरोध नपरेको निर्वाचन आयोगको कार्यालय बर्दियाले जानकारी दिएको छ ।

इन्सेक क्षेत्रीय कार्यालय पोखराका अनुसार नवलपरासी, रुपन्देही, कपिलवस्तु, अर्घाखाँची, गुल्मी र पाल्पामा प्रचार अभियान शान्तिपूर्ण रूपमा भइरहेको छ ।

नवलपरासी जिल्ला प्रतिनिधि नारायण पराजुलीका अनुसार जिल्लामा असार ५ गतेको अवस्था सामान्य रहेको छ । यद्यपी आज बिहान पाल्ही नन्दन गाउँपालिका-४ हरपुर अन्तर्गत परासी-महेशपुर सडक खण्डमा विष्फोटक पदार्थ भेटिएपछि नेपाली सेनाको टोलीले सो बम निष्क्रिय बनाएको थियो ।

अर्घाखाँची जिल्ला प्रतिनिधि नारायण भुसालका असार १४ गते हुने स्थानीय तह निर्वाचनको उम्मेदवारी दर्तापछि राजनीतिक दलहरूले थप उत्साहपूर्वक आ-आफ्ना गतिविधिहरू सञ्चालन गर्दै प्रचारप्रसार गरिरहेका छन् ।

उम्मेदवारी दर्तापछि मुख्य निर्वाचन अधिकृतको कार्यालय र निर्वाचन अधिकृतको कार्यालयले आफ्नो काम अगाडि बढाइरहेको जानकारी दिएको छ । उम्मेदवारी दर्तासँगै जिल्लाको सुरक्षा अवस्थालाई मजवुत बनाइएको जिल्ला प्रशासन कार्यालयले जनकारी दिएको छ । जिल्लामा अहिलेसम्म कुनै अप्रिय घटनाका नभएको र शान्तिपूर्ण रूपमा निर्वाचन सम्बन्धित गतिविधिहरू सञ्चालन भइरहेको जिल्ला प्रहरी कार्यालयका इन्स्पेक्टर प्रदिपकुमार डिसीले जानकारी दिए ।

उम्मेदवारी दर्ताको दिन भुमिकास्थान नगरपालिकाका मुख्य राजनीतिक दलहरू, काङग्रेस, एमाले, माओवादी केन्द्र, राष्ट्रिय जनमोर्चाले निर्वाचन आचारसंहिता उल्लङ्घन गरेको आरोप छ ।

निर्वाचन आचारसंहिता अुनसार उम्मेदवारको लागि निर्धारण गरिएको सवारी साधन भन्दा बढी सवारी साधन प्रयोग गरी दलहरूले कार्यकर्ता ओसारपसार गरेका थिए । सबै पार्टीले निर्वाचन अधिकृतको कार्यालय भन्दा १० मिटर नजिक नाराजुलुस, र निर्वाचन आचारंहिता विपरीत विभिन्न राजनीतिक दलको चुनाव चिन्ह अङ्कित टोपी र टिसर्ट प्रयोग गरेका थिए ।

यसैगरी कपिलवस्तु, रूपन्देही, गुल्मी, पाल्पा जिल्ला प्रतिनिधिका अनुसार ति जिल्लाको अवस्था सामान्य रहेको छ । असार ४ गते उम्मेदवारी दर्ता गरेका राजनीतिक दलका प्रतिनिधिहरूले उत्साहपुर्ण रूपमा निर्वाचन प्रचारप्रसार कार्यक्रम गरिरहेका छन् ।

अनलाइन डेस्क