छात्राहरूमाथि यौन दुर्व्यवहार गर्ने शिक्षकहरूलाई कारबाही नभएको भन्दै विद्यार्थीद्वारा विद्यालयमा प्रदर्शन र तोडफोड

  ०७८ चैत २३ गते

छात्राहरूमाथि यौन दुर्व्यवहारको आरोप लागेका तीन जना शिक्षकलाई कारबाही नभएको भन्दै बागमती गाउँपालिका–८ मा रहेको जनता मावि फापरबारीका विद्यार्थीले ०७८ चैत २२ गते विद्यालयमा विरोध प्रदर्शन  र तोडफोड गरेका छन् ।

विद्यालयका शिक्षकहरू रुद्रबहादुर विक, हेमबहादुर विक र लोकबहादुर विकले कक्षाकोठामा रहँदा गलत नियतले संवेदनसील अङ्गहरूमा छुने, अपशब्द बोल्ने गरेको कक्षा ९, १० र ११ मा अध्ययनरत १५ जना भन्दा बढी छात्राहरूको आरोप छ ।

सरहरूको कक्षामा बेन्चको छेउमा समेत बस्न डरमर्दो हुने गरेको छात्राहरूको भनाई छ । तीन जनै शिक्षकहरूले पछिल्लो डेड महिनादेखि छात्रामाथि यौन दुर्व्यवहार गरेको भनी ०७८ चैत १४ गते विद्यालयमा निवेदन दिएका थिए ।

निवेदनमा छलफल गर्न चैत २२ गते विद्यालय परिसरमा बैठक बसेको थियो । बैठकमा भएको छलफलमा चित्त नबुझेको भन्दै आक्रोशित विद्यार्थीहरूले तोडफोड गरेका हुन् ।

तोडफोडबाट १५ लाख रुपैयाँभन्दा बढीको क्षति भएको प्रध्यानाध्यापक बसन्त राईले बताउनु भयो ।

स्थानीय समेत रहेका तीनै जना शिक्षक केही दिनदेखि बिदामा बसेको जानकारी आएको इलाका प्रहरी कार्यालय फापरबारीका प्रहरी निरीक्षक कमल लुङ्गेलीले बताउनुभयो ।

उहाँले प्रहरीमा कुनै उजुरी नआएको बताउँदै घटनाको आवश्यक थप अनुसन्धान भइरहेको बताउनुभयो ।


पुष्पराज अधिकारी